Buzëqeshja e bardhë dhe e përsosur është një ëndërr për shumë njerëz, por realiteti shpesh shfaq shenja paralajmëruese në dhëmbë. Njollat e verdha, pikat kafe, apo njollat e bardha të çelëta nuk janë vetëm një shqetësim estetik, por mund të tregojnë probleme shëndetësore që variojnë nga prishja e dhëmbëve deri te sëmundje më të rënda, si ato të mëlçisë.
Shenja të dhëmbëve që zbulojnë probleme shëndetësore.
Sipas Allen Zhang, teknolog dentar dhe themelues i ProDENT, dhëmbët mund të shërbejnë si tregues të hershëm për atë që po ndodh në trup. Ai thekson se mjetet e avancuara, si kamerat intraorale, mund të ndihmojnë në zbulimin e këtyre ndryshimeve në ngjyrë para se ato të kthehen në probleme serioze.
Njollat e verdha shpesh lidhen me konsumimin e tepërt të kafesë ose çajit, por sipas ekspertit, ato mund të jenë edhe shenjë e problemeve me mëlçinë. Kur mëlçia nuk funksionon siç duhet, në trup grumbullohet bilirubina, duke ndikuar në ngjyrën e dhëmbëve.
Dhëmbët me nuancë gri të zbehtë mund të tregojnë trauma të mëparshme ose të sinjalizojnë sëmundje si celiakia, e cila dëmton formimin e smaltit.
Njollat kafe shpesh janë shenjë e hershme e kariesit, por gjithashtu mund të shkaktohen nga fluoroza e rëndë, një gjendje e shkaktuar nga sasia e tepërt e fluorit gjatë zhvillimit të dhëmbëve. Kjo shpesh ndodh për shkak të përdorimit të pasaktë të pastave me fluor.
Nga ana tjetër, gjurmët blu ose gri lidhen shpesh me antibiotikët e marrë gjatë fëmijërisë.
Njollat e bardha, të njohura si “chalky spots,” janë një tregues i hershëm i prishjes së dhëmbëve, ndërsa ngjyrosjet e zeza tregojnë karies të avancuar ose inde të vdekura. Në raste të rralla, ato mund të lidhen me ekspozimin ndaj metaleve të rënda.
Edhe smalti i njollosur dhe i pabarabartë mund të sinjalizojë çrregullime gjenetike, duke theksuar se shëndeti oral është një pasqyrë e shëndetit të përgjithshëm të trupit.
”Dhëmbët tregojnë atë që trupi ende nuk e ka zbuluar,” paralajmëron Zhang, duke shtuar se parandalimi është thelbësor. Sipas CDC, mbi 3.7 miliardë njerëz në botë vuajnë nga sëmundje orale, të cilat nëse nuk trajtohen, mund të çojnë në infeksione kërcënuese për jetën. /Korrespodenti