Presidenti amerikan deklaroi në Mount Rushmore se komunizmi është “armiku i 4 Korrikut”, sulmoi demokratët progresistë dhe e lidhi retorikën e tij me emigracionin, në prag të zgjedhjeve afatmesme…
Në një fjalim të mbajtur të premten në mbrëmje në Mount Rushmore, presidenti i SHBA-së pretendoi se një “kërcënim komunist” në ringjallje përbën një rrezik serioz për vendin.
Donald Trump ka hapur fundjavën e festimeve për 250-vjetorin e Amerikës me një sulm të jashtëzakonshëm politik ndaj asaj që ai e quajti “kërcënimi komunist” në SHBA, duke i paraqitur mbështetësit e tij si “armiqtë e 4 Korrikut 1776”.
Presidenti amerikan foli për rreth gjysmë ore të premten në mbrëmje në Mount Rushmore, në Dakotën e Jugut, ndalesa më e fundit e turit të tij për të shënuar përvjetorin historik të Shpalljes së Pavarësisë së Shteteve të Bashkuara nga Britania.
I pritur me thirrjet “USA! USA!” dhe i ndërprerë për pak çaste nga një fluturim i avionëve luftarakë F-16, Trump lavdëroi katër presidentët, fytyrat e të cilëve janë skalitur në malin prej graniti: George Washington, Thomas Jefferson, Theodore Roosevelt dhe Abraham Lincoln.
“Ishin burra veprimi, burra ambicieje, burra guximi, burra të fatit dhe burra me inteligjencë vërtet të madhe”, tha Trump, i cili nuk e ka përjashtuar asnjëherë idenë që edhe fytyra e tij të shtohet në Mount Rushmore. “Mbi të gjitha, ata ishin njerëzit e mëdhenj të historisë”, shtoi Presidenti amerikan.
Presidenti argumentoi se përjashtueshmëria amerikane nuk buron vetëm nga Kushtetuta, por edhe nga kultura dhe identiteti i veçantë i vendit. Ai dënoi përpjekjet e fundit për “të na e shuar frymën amerikane” dhe për “të na larguar nga historia jonë”, duke u zotuar para një turme kryesisht të bardhë: “Ne do t’ia kthejmë vendit tonë identitetin.”
Më pas Trump hoqi dorë nga çdo përpjekje për të mbajtur një fjalim tradicional presidencial, që synon të ngrihet mbi ndasitë politike, të bashkojë partitë dhe t’u drejtohet qytetarëve të të gjitha bindjeve.
Në vend të kësaj, katër muaj para zgjedhjeve afatmesme të nëntorit për Kongresin amerikan, ai riktheu një temë që e ka përsëritur vazhdimisht kohët e fundit: paraqitjen e demokratëve progresistë si komunistë që përbëjnë një kërcënim ekzistencial për Amerikën. Trump foli vetëm disa orë pasi Zohran Mamdani, kryebashkiaku i Nju Jorkut dhe një socialist demokratik, mbajti një fjalim në mbështetje të emigrantëve, i cili u pa gjerësisht si një kundërpërgjigje ndaj Trump dhe lëvizjes së tij “Make America Great Again”.
Katër kandidatë progresistë, përfshirë tre socialistë demokratikë, fituan zgjedhjet paraprake të Partisë Demokratike në Nju Jork javën e kaluar dhe në Kolorado të martën. Kandidatë progresistë kanë fituar gjithashtu gara në Kentucky, New Jersey, Ohio, Pennsylvania dhe Texas.
Trump e lidhi retorikën e tij antikomuniste edhe me temën kundër emigracionit, e cila ishte një nga shtyllat kryesore të fushatës së tij zgjedhore.
“Ndërsa po i afrohemi këtij përvjetori madhështor, shohim se identiteti ynë amerikan është sërish nën sulm. Një brez pasi luftuam dhe fituam Luftën e Ftohtë kundër kërcënimit të komunizmit, tani po shohim një ringjallje të kërcënimit komunist në vendin tonë, përfshirë nga të ardhur të rinj në vendin tonë, të cilët përqafojnë ide krejtësisht të kundërta me mënyrën tonë të jetesës dhe suksesin tonë të madh”, tha Trump.
Ai e përshkroi komunizmin si një kërcënim më të madh për lirinë amerikane sesa të dyja luftërat botërore dhe sulmet terroriste të 11 shtatorit 2001.
“Është armiku i Kushtetutës”, deklaroi ai, duke shtuar se “mbi të gjitha, është armiku i 4 Korrikut 1776… Komunizmi është e kundërta e jetës, lirisë dhe kërkimit të lumturisë. Ai është vdekje, tirani dhe kërkim i së keqes.”
Trump argumentoi se komunistët nuk e duan Zotin apo fenë dhe nuk kanë respekt për ligjin, drejtësinë, parimet, traditën apo të drejtat e dhëna nga Zoti.
“Mund të jesh besnik ndaj Karl Marksit ose mund të jesh besnik ndaj Amerikës. Mund të jesh komunist ose patriot. Nuk mund të jesh të dyja”, theksoi Trump.
Presidenti është kritikuar gjerësisht se po e përdor 250-vjetorin për të rishkruar historinë, duke promovuar një rrëfim të përqendruar te burrat e bardhë të krishterë, si Washington dhe Jefferson, pa pranuar se të dy ishin pronarë skllevërish. Në fjalimin e së premtes ai sulmoi interpretimet progresiste të historisë.
“Sa për ata që përhapin gënjeshtra marksiste për trashëgiminë tonë, që u thonë fëmijëve tanë se jetojmë në tokë të vjedhur ose se heronjtë tanë ishin shtypës, ata po bëjnë diçka shumë më të keqe sesa të shpifin për të kaluarën tonë”, tha Trump, ndërsa shtoi “ata po shpifin dhe po sulmojnë të ardhmen tone, ne nuk do ta lejojmë këtë.”
Megjithatë, ai po fliste në Black Hills, një territor që qeveria amerikane ia mori në mënyrë të paligjshme Kombit Sioux në vitin 1877, pasi Kongresi e detyroi fisin të hiqte dorë nga toka që i ishte garantuar me traktat.
Trump vazhdoi duke e barazuar kërcënimin e pretenduar komunist me emigrantët, për të cilët la të kuptohej se mund të dëboheshin nga vendi.
Duke u zotuar se do ta “mposhtë komunizmin shpejt” dhe se do t’i “dërgojë në mërgim”, ai i tha turmës që brohoriste: “ne do t’i largojmë shumë shpejt dhe do të vazhdojmë ta ndërtojmë vendin tonë më të madh, më të mirë dhe më të fortë se kurrë më parë. Amerika nuk do të jetë kurrë një vend komunist”.
Trump i bëri thirrje Kongresit të heqë filibusterin dhe të miratojë Save America Act, një projektligj që është kritikuar gjerësisht si një nismë për kufizimin e së drejtës së votës.
“Nëse e bëjmë këtë, nuk do të humbasim asnjë zgjedhje për njëqind vjet”, tha ai, duke shtuar “Partia komuniste përbëhet nga emigrantë të paligjshëm, kriminelë dhe kushdo që nuk dëshiron të punojë.”
Më herët gjatë mbrëmjes, aktorë që interpretonin Washingtonin, Jeffersonin, Rooseveltin dhe Lincolnin qëndruan pas foltoreve në një skenë të mbuluar me qilim blu dhe recituan disa nga thëniet e tyre më të njohura. Këngëtari i muzikës country, Chancey Williams, mbajti një koncert. Në turmë, një djalë mbante një pankartë të shkruar me dorë ku lexohej: “Trump the GOAT”.
Të shtunën, Trump, miratimi publik i të cilit mbetet pranë niveleve më të ulëta historike, pritet t’i drejtohet një turme në National Mall në Uashington përpara një shfaqjeje të madhe fishekzjarrësh, ndërsa një valë e fortë të nxehti ka penguar festimet e Ditës së Pavarësisë në mbarë vendin.