Presidenti turk, Recep Tayyip Erdogan, ka zhvilluar një bisedë telefonike me presidentin amerikan, Donald Trump. Sipas një njoftimi të Presidencës turke, gjatë këtij komunikimi, Trump ka shprehur urimet e tij për suksesin e Samitit të Organizatës së Shteteve Turkishtfolëse.
Nga ana e tij, Erdogan ka theksuar se Ankaraja do të vazhdojë përpjekjet për zhvillimin e marrëdhënieve me Uashingtonin dhe për forcimin e bashkëpunimit në të gjitha fushat.
Ai ka vënë në dukje se marrëdhëniet mes dy vendeve do të shënojnë 100-vjetorin e tyre vitin e ardhshëm.Një tjetër temë e diskutuar gjatë bisedës ishte situata në Ngushticën e Hormuzit dhe në Jemen. Erdogan ka deklaruar se zhvillimet në këto zona po ndiqen nga afër dhe se po bëhen përpjekje për zgjidhjen e çështjeve përmes rrugëve diplomatike.
Gjatë bisedës është diskutuar edhe lufta mes Ukrainës dhe Rusisë. Presidenti turk ka rikonfirmuar gatishmërinë e Ankarasë për të mbështetur përpjekjet diplomatike mes dy vendeve, me synimin për të ringjallur procesin e negociatave dhe për t’i dhënë fund luftës.
Kjo bisedë telefonike zhvillohet në kuadër të kontakteve mes Ankarasë dhe Uashingtonit për forcimin e marrëdhënieve dypalëshe. Gjithashtu, palët kanë trajtuar çështje që prekin sigurinë rajonale dhe ndërkombëtare.