Trajneri gjerman, Andre Breitenreiter është njëri prej kandidatëve kryesor për të marrë drejtimin e Përfaqësueses së Kosovës, shkruan mediumi zviceran ’20 minuten’.
Kosova është në kërkim të një trajneri të ri pas shkarkimit të Glihas dhe Breitenreiter po shihet si pretendenti kryesor për të marrë drejtimin e “Dardanëve”.
Sipas raportimit, thuhet se udhëheqësit e FFK-së kanë zhvilluar diskutime konstruktive me teknikun 50-vjeçar dhe gjatë ditëve në vazhdim pritet të mbahet edhe një takim mes palëve.
Breitenreiter ka udhëhequr disa skuadra gjatë karrierës së tij, më së shumti ato gjermane. Ai është pa punë që nga shkurti i këtij viti kur u shkarkua nga Hoffenheimi.
Më parë ai ishte trajner te Paderborn, Hannover dhe Schalke, deri kur iu bashkua Cyrihut në vitin 2021. Tekniku gjerman arriti titullin e kampionit me Cyrihun, ku në radhët e veta kishte edhe futbollistët kosovarë, Fidan Aliti e Mirlind Kryeziu.
Me trajnerin e ri Kosova synon që të arrijë suksese në garat ndërkombëtare, pas dështimeve të njëpasnjëshme tash e disa vite.
Përpos Breitenreiter emra të përafërt për të marrë drejtimin e Kosovës janë edhe Roberto Carlos e Senol Gunes.
