Zyrtarët indianë po hetojnë nëse mangësitë në sigurinë e furnizimit me një përbërës farmaceutik ishin përgjegjëse për kontaminimin e shurupit të kollës, që ka vrarë të paktën 24 fëmijë në muajt e fundit, sipas tre personave të njohur me çështjen.
Tre zyrtarët e shëndetit dhe sigurisë së barnave nga shteti Tamil Nadu i thanë Reuters se besojnë se tretësi i përdorur për të bërë një sasi të shurupit të kollës Coldrif, mund të jetë kontaminuar me një kimikat toksik rreth kohës së furnizimit të prodhuesit të barnave, Sresan Pharmaceutical Manufacturer.
Sresan bleu 50 kg tretës propilen glikol (PG) nga distributori lokal i kimikateve Sunrise Biotech më 25 mars, i cili e kishte blerë atë po atë ditë nga Jinkushal Aroma, një kompani e vogël që prodhon përzierje aromash për detergjentë të lëngshëm dhe kimikate të tjera, sipas intervistave me furnizuesit dhe një raporti hetimor të 3 tetorit nga rregullatori farmaceutik i Tamil Nadu-së, i parë ekskluzivisht nga Reuters.
Departamenti i Kontrollit të Drogave në Tamil Nadu, nuk iu përgjigj kërkesave të përsëritura për komente në lidhje me hetimin e tij.
Autoritetet kanë thënë se shurupi Coldrif ishte shumë i kontaminuar me një toksinë të njohur industriale, dietilen glikol (DEG). Ata po hetojnë se si është shtuar kimikati në tretës, i cili përdoret në shurupin e kollës si bazë për tretjen e përbërësve të tij aktivë.
Vdekjet, të cilat filluan në shtator, kanë ringjallur shqetësimet në lidhje me standardet e sigurisë në sektorin farmaceutik prej 50 miliardë dollarësh të Indisë, i cili u njollos nga vdekjet e më shumë se 140 fëmijëve në Afrikë dhe Azinë Qendrore në vitet 2022 dhe 2023 nga shurupet e kollës të prodhuara në Indi, të bëra me tretës të kontaminuar.
Pas këtyre vdekjeve, Nju Delhi ishte zotuar të përmirësonte kontrollet e cilësisë.
Zyrtarët indianë të shëndetësisë thonë se DEG ndonjëherë përdoret në mënyrë mashtruese ose të paqëllimshme në ilaçe, në vend të PG-së më të shtrenjtë. Marrja e niveleve të larta të saj, është lidhur me dëmtime akute të veshkave dhe vdekje tek fëmijët.
Reuters po raporton për herë të parë detaje rreth fokusit të hetimit indian, si dhe shkeljeve në praktikat globale të sigurisë farmaceutike në dërgimin e kimikateve në Sresan.
Licenca e prodhimit të Sresan është revokuar dhe themeluesi i saj G. Ranganathan është në paraburgim. Përpjekjet për të kontaktuar përfaqësuesit në zyrën e korporatës së Sresan dhe në shtëpinë e Ranganathan, ishin të pasuksesshme. Reuters nuk mundi të identifikonte një përfaqësues ligjor për Ranganathan.
Organizata Qendrore e Kontrollit të Standardeve të Barnave, e cila mbikëqyr produktet farmaceutike në nivel federal, i drejtoi pyetje ministrisë së shëndetësisë së Indisë, e cila nga ana tjetër ia referoi Reuters një deklarate qeveritare ku thuhej se po kryente më shumë inspektime të objekteve farmaceutike dhe po shqyrtonte përdorimin pediatrik të shurupeve të kollës.
Prodhuesit e kimikateve zakonisht u dorëzojnë klientëve tretës PG në enë të mbyllura për të shmangur kontaminimin, por Sunrise i konfirmoi Reuters se e kishte ripaketuar tretësin pa vulë përpara se ta dorëzonte.
Akti i Indisë për Barnat dhe Kozmetikën ndalon shitjen dhe trajtimin e përbërësve të gradës farmaceutike, siç është PG medicinale, nga subjektet që nuk kanë licenca për ilaçe.
As Jinkushal dhe as Sunrise nuk kanë licenca për trajtimin e përbërësve të gradës farmaceutike, konfirmuan dy distributorët me shumicë për Reuters. Pronarët e tyre thanë se nuk ishin në dijeni se PG-ja që kishin shitur do të përdorej për të bërë ilaçe.
Si operatori i Sunrise, Vipul Jain, ashtu edhe pronari i Jinkushal, Jitender Vishwakarma, thanë se nuk trajtonin DEG shumë toksik dhe nuk kishin dijeni se si mund të ishte kontaminuar tretësi.
Reuters nuk ishte në gjendje të përcaktonte se si ndodhi ndotja ose kush ishte përgjegjës.
Inspektimet e kryera nga rregullatori shtetëror pas vdekjeve gjetën qindra shkelje “kritike” dhe “të mëdha” në fabrikën e Sresan jashtë qytetit jugor të Chennai-t, duke përfshirë ruajtjen e produkteve në “kushte johigjienike” dhe “falsifikimin e të dhënave”, sipas raportit të 3 tetorit. Megjithatë, rregullatori nuk i lidhi këto shkelje drejtpërdrejt me vdekjet.
KIMIKATE TË RIPAKETUARA
PG-ja që Sresan u tha inspektorëve se përdorte ishte prodhuar nga prodhuesi koreano-jugor SK picglobal, sipas një certifikate analize të ndarë nga Jinkushal dhe Sunrise me hetuesit, të shqyrtuar nga Reuters.
Certifikata përfshinte datën e prodhimit të PG-së, si dhe detaje specifike rreth përmbajtjes së saj kimike. Reuters nuk mundi të verifikonte në mënyrë të pavarur saktësinë e përmbajtjes, megjithëse një zëdhënës i SK picglobal tha se kopja e parë nga agjencia e lajmeve, dukej të ishte autentike.
SK picglobal eksportoi tretësin në një fuçi të mbyllur 215 kg te një distributor indian, i cili ia shiti Jinkushal.
Vishwakarma i Jinkushal tha se ai i kishte thyer vulat dhe e kishte ripaketuar tretësin në dyqanin e tij, përpara se t’ia shiste një pjesë të tij shpërndarësit të kimikateve Sunrise.
Jain i Sunrise tha se më pas e transportoi kimikatin në Sresan në dy kontejnerë pa vula mbrojtëse, sepse prodhuesi i ilaçeve nuk kishte dashur të gjithë sasinë origjinale prej 215 kg të furnizimit.
Zëdhënësi i SK picglobal tha se kompania ndalon rreptësisht ripaketimin ose rishpërndarjen e produkteve të saj.
E pyetur nëse kufizime të tilla ishin përfshirë në kontratat e saj të shitjes, kompania tha se u kishte thënë klientëve në takime, se nuk “garanton cilësinë e produkteve që janë ripaketuar ose ndarë në mënyrë arbitrare për shitje”. Ajo nuk dha detaje të mëtejshme.
HISTORIA E SHKELJEVE
Sresan ishte penalizuar më parë nga autoritetet, me themeluesin e saj që u burgos për një ditë në vitet 2020 dhe 2022 për shkak të shqetësimeve në lidhje me produktet e tij, përpara se t’i jepej një gjobë, sipas katër zyrtarëve të njohur me çështjen. Ata nuk ofruan prova dokumentare për penalitetet.
Ministri i shëndetësisë i Tamil Nadusë u tha ligjvënësve muajin e kaluar, se Sresan ishte penalizuar në vitet 2021 dhe 2023 për “shkelje të vogla”, pa dhënë detaje specifike.
Pavarësisht historikut të punës së Sresanit dhe rregulloreve që kërkojnë kontrolle vjetore, fabrika e prodhuesit të ilaçeve nuk ishte inspektuar që nga viti 2023, thanë dy zyrtarë shtetërorë të shëndetësisë.
Reuters nuk mundi të konfirmonte në mënyrë të pavarur, se kur Sresan ishte inspektuar për herë të fundit para vdekjeve./ Reuters.