Një vaksinë eksperimentale kundër kancerit ka treguar rezultate premtuese në një studim të hershëm, duke zgjatur jetën dhe kohën pa rikthim të sëmundjes tek disa pacientë me kancer të pankreasit dhe zorrëve.
Studimi, i publikuar në Nature Medicine, përfshiu 25 pacientë që kishin përfunduar trajtimet standarde, por mbanin ende gjurmë të sëmundjes në gjak. Pas afro 20 muajsh, 17 prej tyre zhvilluan një përgjigje të fortë imunitare ndaj proteinave mutante të tumorit. Tek pacientët me kancer pankreasi, jetëgjatësia mesatare arriti në 29 muaj, duke përfshirë mbi 15 muaj pa kancer.
Vaksina, e krijuar për të synuar mutacionet KRAS – një nga shkaktarët kryesorë të rritjes së tumoreve – u prodhua “gati për përdorim”, ndryshe nga vaksinat e personalizuara që kërkojnë kohë dhe kosto të larta për prodhim. Sipas ekspertëve, kjo mund të sjellë përfitime për një numër të madh pacientësh.
Megjithatë, shkencëtarët paralajmërojnë se gjetjet janë paraprake dhe kërkojnë validim në studime më të mëdha e të rastësishme përpara se vaksina të përdoret gjerësisht. Aktualisht, ajo po testohet në një provë klinike të fazës 2.