Katari njoftoi të mërkurën “largimin e një personeli të caktuar nga Baza Ajrore Al Udeid”, një bazë kyçe amerikane, për shkak të “tensioneve aktuale rajonale”.
Ky njoftim erdhi menjëherë pas raportimeve nga mediat amerikane, të cilat citonin burime të Pentagonit se SHBA po tërhiqte disa nga stafin e saj nga bazat kryesore në Lindjen e Mesme si masë paraprake, ndërsa Presidenti amerikan Donald Trump po shqyrton veprime ushtarake kundër Iranit.
Në një deklaratë, Zyra Ndërkombëtare e Medias e Katarit (IMO) bëri të ditur se masat po merren si pjesë e përpjekjeve më të gjera për t’iu përgjigjur situatës rajonale në zhvillim. IMO riafirmoi se Katari “vazhdon të zbatojë të gjitha hapat e nevojshëm për të mbrojtur sigurinë e qytetarëve dhe banorëve të tij si një përparësi kryesore”, duke përfshirë edhe mbrojtjen e infrastrukturës kritike dhe objekteve ushtarake.
Deklarata vjen në një kohë tensioni të lartë në rajon, ndërsa Dohë bën thirrje për përmbajtje dhe zgjidhje diplomatike. Të martën, Ministria e Punëve të Jashtme e Katarit paralajmëroi se çdo përshkallëzim midis SHBA dhe Iranit mund të ketë pasoja të gjera.
“Çdo përshkallëzim do të kishte rezultate katastrofike në rajon dhe më gjerë,” tha zëdhënësi i Ministrisë së Jashtme, Dr. Majed Al Ansari, duke shtuar se Katari mbetet i angazhuar në bisedime me partnerët rajonalë për të gjetur një zgjidhje diplomatike. Ai shtoi se Katari ka komunikuar vazhdimisht me të gjithë aktorët rajonalë për të ulur tensionet.
“Qeveria ka marrë të gjitha masat e mundshme për të siguruar që siguria e qytetarëve dhe banorëve të Katarit është prioritet i lartë, duke përfshirë mbrojtjen e punonjësve të qeverisë dhe të gjitha palëve të tjera,” tha Dr. Al Ansari.
Tensionet rriten ndërsa Trump ka paralajmëruar Teheranin se SHBA mund të ndërhyjë kundër Iranit në rast se kërcënohet jeta e demonstruesve, të cilët protestojnë prej më shumë se dy javësh për shkak të hiperinflacionit dhe rritjes së kostos së jetesës.