Gjatë një konference për shtyp në Zyrën Ovale, presidenti amerikan Donald Trump njoftoi se ka firmosur një urdhër ekzekutiv për të rikthyer presionin maksimal ndaj Iranit, me qëllim pengimin e regjimit iranian për të zhvilluar armë bërthamore.“Është një masë shumë e ashpër ndaj Iranit,” theksoi Trump. “Shpresoj që të mos kemi nevojë ta përdorim shpesh, por është e nevojshme.”
Ai gjithashtu bëri një deklaratë tronditëse, duke zbuluar se ka lënë “udhëzime të qarta” në rast se vritet nga regjimi iranian:
“Nëse Irani do të më vriste, do të zhdukej,” u shpreh Trump, duke nënkuptuar një përgjigje të ashpër dhe të menjëhershme ushtarake nga Shtetet e Bashkuara.Në një tjetër vendim të rëndësishëm, Trump ka firmosur një urdhër për tërheqjen e SHBA-së nga Këshilli i OKB-së për të Drejtat e Njeriut, duke akuzuar këtë organ për qëndrime të njëanshme kundër Izraelit.
“SHBA nuk do të financojë më UNRWA-n,” shtoi ai, duke iu referuar Agjencisë së Kombeve të Bashkuara për Ndihmën e Refugjatëve Palestinezë.
Vendimet sinjalizojnë një kthesë të fortë në politikën e jashtme amerikane, me fokus tek presioni maksimal ndaj Iranit dhe një qëndrim më kritik ndaj organizatave ndërkombëtare si OKB-ja.
“Që nga dita e parë, mbështetja e Shteteve të Bashkuara për OKB-në ka shpëtuar shumë njerëz dhe ka avancuar sigurinë globale,” tha zëdhënësi i OKB-së, Stephane Dujarric.
“Sekretari i Përgjithshëm i OKB-së mezi pret të vazhdojë marrëdhëniet e tij produktive me Presidentin Trump dhe qeverinë amerikane për të forcuar këtë marrëdhënie në botën e sotme të trazuar.”
Presidenti Trump tha se ai nuk po synonte të pezullonte fondet nga organizata prej 193 anëtarësh, megjithëse u ankua se Uashingtoni është i detyruar të paguajë një shumë joproporcionale si anëtar i OKB-së.
Uashingtoni është kontribuesi më i madh financiar i OKB-së, i pasuar nga Kina, që përbën 22% të buxhetit bazë të OKB-së dhe 27% të buxhetit për operacionet paqeruajtëse. OKB-ja ka thënë se Shtetet e Bashkuara aktualisht kanë një detyrim financiar prej 2.8 miliardë dollarësh, nga të cilat 1.5 miliardë dollarë janë për buxhetin e rregullt.