Macaulay Culkin, aktori që u shndërrua në simbolin global të fëmijërisë përmes filmit “Home Alone”, mori vendimin drastik për të braktisur kinematografinë në moshën 14-vjeçare, menjëherë pas një beteje të egër gjyqësore mes prindërve të tij për kontrollin e pasurisë prej 17 milionë dollarësh.
Suksesi financiar i Culkin kishte pësuar një rritje marramendëse brenda pak viteve, ku nga 110 mijë dollarë që u pagua për filmin e parë “Home Alone” në vitin 1990, honorari i tij u rrit në 4,5 milionë dollarë për pjesën e dytë dhe kulmoi me 8 milionë dollarë për rolin kryesor në filmin “Richie Rich” në vitin 1994.
Kjo rritje e rrufeshme e ktheu atë në aktorin fëmijë më të paguar në historinë e kinematografisë deri në atë kohë, por njëkohësisht nxiti një përplasje të hapur familjare.
Në vitin 1995, ndarja e prindërve të tij, Kit Culkin dhe Patricia Brentrup, u pasua nga një luftë e ashpër ligjore për kujdestarinë e fëmijëve dhe administrimin e fitimeve të djalit.
I lodhur nga shfrytëzimi financiar dhe presioni i madh mediatik, 14-vjeçari ndërmori një hap të paprecedent duke kërkuar në rrugë gjyqësore heqjen e të drejtës së prindërve mbi fondin e tij besimtar. Gjykata vendosi emërimin e një financieri të pavarur për menaxhimin e pasurisë deri në moshën e tij madhore, ndërsa aktori ndërpreu përfundimisht çdo kontakt me të atin.
Vendimi ligjor u pasua nga një tërheqje e menjëhershme nga aktrimi, me Culkin që nuk realizoi asnjë projekt filmik për pothuajse një dekadë me radhë, për t’u rikthyer në ekran vetëm në vitin 2003 me filmin “Party Monster”. Historia e tij mbetet sot një nga shembujt më të spikatur në Hollivud për pasojat e famës së parakohshme dhe përplasjeve financiare mbi fëmijët aktorë./Korrespodenti