Këto thirrje vijnë një ditë pas takimit të Presidentit Zelensky me Vuçiçin, ku u shpreh se Ukraina vazhdon të mos e njohë Kosovën si shtet të pavarur…
Marshimi i zhvilluar në ditën e 71-të të tubimit qytatarë në Tiranë është zhvendosur para ambasadave të Serbisë dhe Ukrainës, ku protestuesit kanë brohoritur disa herë “UÇK! UÇK! UÇK!”.
Thirrjet janë dëgjuar një ditë pas takimit mes presidentit të Ukrainës, Volodymyr Zelensky, dhe presidentit të Serbisë, Aleksandar Vuçiç. Në kontekstin e këtij takimi është rikthyer në vëmendje qëndrimi i Kievit, i cili vazhdon të mos e njohë Kosovën si shtet të pavarur.
Qëndrimi i Ukrainës ka nxitur reagime edhe në Kosovë, ndërsa një prej veprimeve që tërhoqi vëmendje ishte largimi në Prishtinë i mbishkrimit të madh “Free Ukraine”, i cili ishte vendosur në objektin e Hotel Grand.
Reagime ka pasur edhe nga Ukraina. Një deputet ukrainas publikoi në platformën “X” deklaratën e Zelenskyt, së bashku me një fotografi që tregonte largimin e mbishkrimit “Free Ukraine” në Prishtinë. Ai e cilësoi qëndrimin e presidentit ukrainas si një “gabim diplomatik”, ndërsa u shpreh në favor të njohjes së Kosovës nga Ukraina.
“Ky është një gabim diplomatik. Ukrainasit mbështesin pavarësinë e Kosovës dhe ne besojmë se Ukraina DUHET ta njohë shtetin. Unë do të vazhdoj të luftoj për pavarësinë e Kosovës dhe përfundimisht Ukraina do ta njohë atë”, shkroi deputeti ukrainas në “X”.
Ukraina është ndër shtetet evropiane që nuk e njohin pavarësinë e Kosovës. Çështja ka marrë vëmendje të shtuar pas takimit Zelensky–Vuçiç dhe reagimeve që pasuan në Kosovë dhe Ukrainë.
Ndërkohë, marshimi në Tiranë dhe ndalesa e protestuesve pranë përfaqësive diplomatike të Serbisë dhe Ukrainës e kanë sjellë këtë debat edhe në tubimin që po zhvillohet prej 71 ditësh në kryeqytetin shqiptar.