Njeriu që u shndërrua në një “laborator njerëzor” dhe shpenzon 2 milionë dollarë në vit për të mposhtur plakjen, sapo është gjunjëzuar nga vetë trupi i tij. Bryan Johnson, 48-vjeçari nga Silicon Valley i njohur globalisht për projektin e tij ekstrem të jetëgjatësisë “Blueprint”, ka njoftuar publikisht se është diagnostikuar med një sëmundje të pashërueshme autoimune të quajtur Gastrit Autoimun (AIG). Lajmi, i bërë publik në fund të qershorit 2026, ka tronditur komunitetin shkencor dhe ka ngritur pikëpyetje të mëdha mbi kufijtë e bio-hakimit.
Sëmundja e sapozbuluar nënkupton se sistemi imunitar i miliarderit ka pësuar një “defekt” dhe ka filluar të shkatërrojë trupin e tij nga brenda. “Stomaku po më ha veten”, e ka përshkruar vetë Johnson situatën e tij të rëndë. Në këtë gjendje, antitrupat e vetë organizmit ngatërrojnë qelizat e shëndetshme të mukozës së stomakut me një armik të jashtëm dhe kanë nisur t’i asgjësojnë ato. Ky sulm pengon prodhimin e acidit gastrik dhe të një proteine jetike që ndihmon në përthithjen e Vitaminës B12 dhe hekurit. Pa këto elemente, trupi rrezikon anemi të rëndë, dëmtime neurologjike dhe, në plan afatgjatë, pezmatimi kronik rrit ndjeshëm rrezikun e shfaqjes së kancerit të stomakut.
Informacionet mjekësore të zbuluara tregojnë se kjo nuk ishte një goditje e papritur, buronte nga një dështim i madh monitorimi nga ekipi i tij mjekësor. Për rreth 11 vite me radhë, mjekët e Johnson-it kishin vënë re nivele jashtëzakonisht të ulëta të ferritinës (depozitave të hekurit) në gjakun e tij. Pavarësisht dietës strikte vegane, qindra suplementeve dhe trajtimeve të panumërta, trupi i tij refuzonte në mënyrë kokëfortë të mbante hekur. Diagnoza u konfirmua përfundimisht vetëm tani, përmes biopsive të thella të stomakut dhe analizave të gjakut, të cilat treguan se antitrupat e tij autoimunë ishin pesë herë më të lartë se norma e lejuar.
Ky rast përbën një nga paradokset më të mëdha të kohës sonë, ku një pasuri përrallore përplaset me kufijtë e biologjisë. Johnson zgjohet çdo ditë në orën 05:00 të mëngjesit, konsumon saktësisht 2,250 kalori në ditë, merr mbi 100 suplemente dhe monitoron çdo sekretim apo lëvizje të organeve të tij përmes pajisjeve më të avancuara të teknologjisë. Ai madje u bë i famshëm në mbarë botën për transfuzionet e plazmës që mori nga djali i tij adoleshent në përpjekje për të përtërirë qelizat. Megjithatë, e gjithë kjo teknologji dhe miliardat e tij dështuan përpara një çrregullimi që mjekësia standarde ende e konsideron kronik dhe të pakurueshëm.
Edhe pse përballë një dështimi evident, miliarderi refuzon t’i bindet mjekësisë tradicionale, e cila thjesht rekomandon injeksione të përjetshme të Vitaminës B12. Besnik i parimit të tij “Don’t Die” (Mos Vdis), Johnson po e trajton trupin e tij si një kod kompjuteri që ka nevojë për riparim dhe ka nisur një projekt të ri eksperimental. Përmes inteligjencës artificiale dhe profilizimit të thellë gjenetik, ekipi i tij po përpiqet të deshifrojë rreth 1 milion qeliza imunitare, me synimin për të gjetur saktësisht se cili grup qelizash po sulmon stomakun dhe për t’i “fikur” ato përmes terapive të reja. Ky rast mbetet një leksion i hapur se sëmundjet autoimune mbeten një nga misteret më të mëdha të biologjisë njerëzore, duke vërtetuar se natyra dhe evolucioni nuk mund të hakohen aq lehtë sa një aplikacion./Korrespodenti