29 Nëntor 2023. Liridona Ademaj-Murseli vritet në makinë, në rrugën “Dalip Alshiqi”. Po shkonte në shtëpi bashkë me bashkëshortin dhe fëmijët.
Ngjarja e së mërkurës mbrëma ka tronditur opinionin në Kosovë.
Vrasja e dyshimtë e Liridonës ka aktivizuar menjëherë Policinë në gjetjen e dorasit.
“Raportohet se viktima femër kosovare, derisa ka qenë me bashkëshortin dhe dy fëmijët e tyre me veturë, një person i panjohur i armatosur i ka ndaluar dhe ua ka kërkuar të gjitha gjërat me vlerë dhe është qëlluar me armë zjarri për vdekje. Lidhur me rastin është intervistuar bashkëshorti i saj, dëshmitari mashkull kosovar i cili kishte arritur të largohet nga vetura me dy fëmijët e tyre. Njësit relevante policore, prokurori dhe ndihma e shpejtë urgjente kanë dalë në vendin e ngjarjes, nga mjeku është konstatuar vdekja e viktimës. Me urdhër të prokurorit trupi i pajetë i viktimës është dërguar në IML për obduksion” thuhet në raportin e Policisë.
Atë natë, Naim Murseli deklaroi para hetuesve policorë se hajnat fillimisht iu kanë kërkuar gjërat me vlerë, duke marrë paratë dhe telefonat.
Kjo situatë dyshohet se e detyroi Murselin që t’i largojë fëmijët nga vetura, por aty mbeti bashkëshortja e tij, e cila fatkeqësisht u vra me armë zjarri.
Në varrezat e fshatit Cërmjan të Gjakovës, Liridonës 30 vjeçare sot iu dha lamtumira e fundit!
Pak orë pas varrimit të saj, policia doli me njoftim se dy persona u arrestuan, nën dyshimin se ishin të përfshirë në vrasjen e Liridonës.
“Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipër shënuar. Njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë”, bëri të ditur Policia.
Indeksonline raporton se të dyshuarit në fjalë janë Naim Murseli dhe Granit Plava.
Granit Plava, dyshohet të jetë dorasi që i mori jetën Liridonës mbrëmjen kritike të së mërkurës.
Naim Murseli, bashkëshorti prej disa vitesh i Liridonës, dyshohet të ketë implikuar vrasjen e Liridonës, duke e urdhëruar atë.
Të dy raportohet të kenë pranuar veprën penale: urdhrin e vrasjes dhe kryerjen e saj.
Pak më vonë, Policia ka arrestuar edhe një person të tretë, i dyshuar për bashkëpunim me dyshen Murseli-Plava.
Kushtrim Kokolla, pjesëtar i FSK-së, dyshohet se është bashkëpunëtor në kryerjen e këtij krimi.
Vëllau i Kushtrimit, Kanoni, deklaroi më herët për Indeksonline se Kushtrimi ka qenë në shtëpi kur ka ndodhur rasti, se nuk beson se ka bërë një gjë të tillë dhe se Kushtrimi ka qenë shumë i lidhur me Liridonën, meqë njihen edhe familjarisht.
Në anën tjetër, familja e Liridonës ka kërkuar të bëhet zhvarrosja e saj, dhe se trupi i Liridonës të pushojë në varrezat e fshatit Rracaj, ku edhe banon familja Ademaj.
Ndërkaq, familja Murseli, pas arrestimit të Naimit, njoftoi se ka anuluar të pamën për Liridonën.
Reagimet mbi vrasjen e Liridonës nuk janë ndalur që nga pasditja e së mërkurës.
Politikanë, aktivistë të shoqërisë civile e qytetarë kanë shprehur opinionet dhe ngushëllimet e tyre lidhur me rastin.
Ministria e Mbrojtjes ka njoftuar se me rastin e Kushtrim Kokollës po merren organet e drejtësisë dhe ato përbrenda FSK-së.
Ministrja e Drejtësisë, Albulena Haxhiu, tha se ky krim nuk do të mbetet pa u ndëshkuar.
“Njëri nga personat e arrestuar është bashkëshorti i të ndjerës Liridonës, i cili ishte përpjekur ta fshihte krimin e rëndë duke thënë që ishin cak i një grabitje. Ky krim nuk do të mbetet pa u ndëshkuar. Kriminelët do të përballen me drejtësinë”, ka deklaruar Haxhiu.
Shpresojmë që raste të tilla të mos ndodhin më!/Indeksonline/