Ndërsa Evropa përballet me nxehtësinë ekstreme, një valë akulli me forcë të paparë, madje edhe për Hemisferën Jugore, ka përfshirë Argjentinën, duke thyer rekordet historike për temperaturat më të ulëta dhe duke shkaktuar vdekjen e të paktën nëntë personave në dhjetë ditët e fundit.
Numri i të pastrehëve po rritet në mënyrë dramatike, paralajmëron një organizatë joqeveritare që merret me këtë problem.
Vala e të ftohtit është bërë edhe më e fortë që nga fillimi i javës, dhe dje në kryeqytetin Buenos Aires u regjistrua një temperaturë prej -19 gradë Celsius – më e ulëta në 34 vitet e fundit, sipas Shërbimit Meteorologjik Argjentinas.
Në zonën më të gjerë të qytetit, në El Palomar u regjistrua -7.4 gradë, temperatura më e ulët në 58 vjet dhe e dyta më e ulët që nga viti 1935.
Plazhet në Atlantik, si Miramar, 450 kilometra larg Buenos Aires u mbuluan me borë në fillim të javës, gjë që nuk ka ndodhur në 12 vitet e fundit.
Qyteti me temperaturën më të ulët është Makindsao, një qytet i vogël me 3,000 banorë në Patagoni, 1,400 kilometra në jug të kryeqytetit, ku temperaturat kanë qenë mesatarisht midis -12 dhe -18 gradë Celsius që nga e hëna. Megjithatë, larg rekordit prej -35 gradë Celsius nga viti 1991 .
Proyecto 7, një organizatë joqeveritare e specializuar në ndihmën e të pastrehëve, njoftoi se në dhjetë ditët e fundit, që nga fillimi i dimrit në hemisferën jugore, nëntë persona kanë vdekur për shkak të ekspozimit ndaj të ftohtit ekstrem. Ky numër nuk është konfirmuar ende nga autoritetet, pasi një raport zyrtar nuk është publikuar ende.
Organizata joqeveritare renditi rastet e raportuara në shtypin lokal gjatë javëve të fundit. Një person i moshuar u gjet i vdekur në një parking në Mar del Plata (jug), ndërsa një burrë u gjet i vdekur në një stol në Parana (veri).