Presidenti i ShBA-së, Donald Trump, dërgoi 2,000 pjesëtarë të Gardës Kombëtare në Los Angeles për të përballuar trazirat që kanë shpërthyer pas operacioneve të ICE kundër emigrantëve pa dokumente.
Shefi i kufirit, Tom Homan, i tha Fox News të shtunën: “Po e bëjmë Los Angeles më të sigurt.”
Kalifornia përjetoi ditën e dytë të trazirave të shtunën, kur banorët e një lagjeje kryesisht latine u përplasën me agjentët federalë të Emigracionit dhe Doganave (ICE). Gazi lotsjellës dhe shkopinjtë u përdorën për të shpërndarë turmat në lagjen Paramount.
Janë bërë deri në 118 arrestime në LA gjatë kësaj jave si rezultat i operacioneve të ICE, përfshirë 44 vetëm të premten. Guvernatori i Kalifornisë, Gavin Newsom, i ka dënuar këto operacione si “të pamëshirshme”.
Situata në Paramount është qetësuar disi, por përplasjet mes protestuesve dhe forcave të rendit vazhdojnë. Ajri është i rëndë – i mbushur me gaz lotsjellës dhe tym jashtë dyqanit Home Depot, ku shpërthyen protestat, raporton The Guardian.
Sherifët e qarkut të LA po përdorin granata ndriçuese dhe gaz lotsjellës çdo pak minuta për të shpërndarë protestuesit. Banorët dhe protestuesit thonë se ka emigrantë të bllokuar brenda bizneseve.