Inspektorati Policor i Kosovës (IPK) ka rekomanduar suspendimin e një zyrtari policor të stacionit policor në Suharekë, pasi ai është kapur duke drejtuar veturën e tij private të paregjistruar që nga viti 2019.
Sipas komunikatës për media, hetuesit e IPK-së kishin pranuar informacione operative që ngritnin dyshime se polici në fjalë po qarkullonte me veturë pa regjistrim.
Pas verifikimit të informatave, zyrtari policor u ndalua sot nga hetuesit në rrugë dhe iu kontrollua dokumentacioni i automjetit. Rezultoi se vetura nuk kishte regjistrim aktiv për më shumë se pesë vjet.
“Hetuesit e Inspektoratit Policor të Kosovës kanë pranuar informacione përmes rrugëve operative bazuar në të cilat dyshohej se një zyrtar policor i Stacionit Policor të Suharekës drejton veturën e tij private pa regjistrim.
Pas pranimit të informacionit është verifikuar informacioni dhe zyrtari në fjalë është ndaluar sot në rrugë nga hetuesit e IPK-së ku pas kontrollit të dokumentacionit të veturës së tij ka rezultuar se ky automjet nuk është regjistruar që nga viti 2019.
Lidhur me rastin janë njoftuar Njësia e Trafikut Rajonal të Prizrenit të cilët kanë ndërmarrë veprimet e nevojshme ligjore kurse IPK ka rekomanduar suspendimin për zyrtarin policor”, thuhet në njoftim.