Zyrtarët amerikanë dhe rusë ranë dakord të eksplorojnë “mundësitë ekonomike dhe investuese” që mund të lindin për vendet e tyre nga përfundimi i luftës në Ukrainë pas bisedimeve në Arabinë Saudite.
Deklaratat nga të dyja palët u bënë mes shqetësimeve në Kiev dhe në mbarë Evropën se Donald Trump mund të shtyjë për një marrëveshje paqeje që favorizon Vladimir Putinin. Asnjë zyrtar ukrainas apo evropian nuk ishte i pranishëm në takim, shkruan The Guardian.
Pas bisedimeve në Pallatin Diriyah në Riad, sekretari amerikan i shtetit, Marco Rubio, tha se ishte arritur një marrëveshje për krijimin e një ekipi të nivelit të lartë për të mbështetur bisedimet e paqes për Ukrainën dhe për të eksploruar “mundësitë që do të shfaqen nga një përfundim i suksesshëm i konfliktit në Ukrainë”.
Kjo shënoi një ndryshim dramatik nga përpjekjet e administratës Biden për të izoluar Moskën. Ministri i jashtëm i Rusisë, Sergei Lavrov, dhe këshilltari kryesor për politikën e jashtme i Putinit, Yuri Ushakov, u fotografuan të ulur përballë Rubio-s, i cili mori pjesë në bisedime së bashku me këshilltarin amerikan për sigurinë kombëtare, Mike Waltz, dhe Steve Witkoff, të dërguarin e posaçëm të Trump-it për Lindjen e Mesme.
Rubio tha se përfundimi i konfliktit në Ukrainë duhet të jetë i pranueshëm për të gjithë të përfshirët, duke përfshirë Ukrainën, Evropën dhe Rusinë, dhe se aleatët evropianë të Uashingtonit ishin konsultuar.
Megjithatë, bisedimet në kryeqytetin saudit nënvizuan ritmin e shpejtë të përpjekjeve amerikane për të ndalur konfliktin, duke shkaktuar alarm në Kiev dhe në mbarë Evropën, ku zyrtarët u takuan të hënën për të diskutuar mundësinë e dërgimit të trupave paqeruajtëse në Ukrainë.