Presidenti ukrainas, Volodymyr Zelensky, ka thënë të shtunën se Ukraina s’mund ta shkelë Kushtetutën e saj lidhur me çështjet territoriale, tek ka shtuar se “ukrainasit nuk do t’ua dorëzojnë tokën e tyre pushtuesve”.
Këto komente të tij janë bërë menjëherë pas lajmit për takimin e datës 15 gusht ndërmjet presidentit amerikan, Donald Trump, dhe presidentit rus, Vladimir Putin, në Alaskë të Shteteve të Bashkuara të Amerikës, ka shkruar Reuters.
Tek e ka komentuar takimin e shumëpritur, Zelensky është shprehur se Ukraina është e gatshme për zgjidhje reale që mund të sjellë paqe të qëndrueshme dhe afatgjatë, porse ka shtuar se çdo zgjidhje e cila e përjashton Kievin do të ishte një zgjidhje kundër paqes.
Njoftimi për samitin e përbashkët Rusi-SHBA është bërë pak orë pasi Trumpi kishte sinjalizuar se Ukraina mund të detyrohej të heqë dorë nga disa territore për të përfunduar luftën, e cila filloi me pushtimin në shkallë të gjerë të Rusisë ndaj fqinjit të saj në shkurt të vitit 2022.
“Po shikoni një territor për të cilin është luftuar për tre vjet e gjysmë, shumë rusë kanë vdekur. Shumë ukrainas kanë vdekur”, ka thënë Trumpi në Shtëpinë e Bardhë të premten.
“Është shumë e ndërlikuar. Do të marrim diçka mbrapsht, do të bëjmë disa ndërrime. Do të ketë shkëmbime territoriale, për të mirën e të dyja palëve”, ka theksuar ai.
Aktualisht, Rusia kontrollon rreth 20 për qind të territorit të Ukrainës.