Një analiste e ka krahasuar vendosjen e tarifave nga Presidenti amerikan Donald Trump me një lojë bixhozi në “një tryezë globale pokeri”, duke paralajmëruar se do të vijnë kohë të pasigurta.
“Ai po e përdor tregun e konsumatorëve amerikanë si këtë çip të madh në tryezën globale të pokerit ekonomik”, tha Rana Foroohar, analiste globale ekonomike e CNN.Kjo është një lojë me rrezik të lartë”, tha ajo për John Vause të CNN, duke shtuar se kjo lëvizje do t’i tronditë tregjet.
Foroohar tha se ky hap do t’i sigurojë presidentit mbështetje nga punëtorët e industrisë së automobilave në vend – por do t’i godasë aleatët.
Ajo parashikoi se Europa do të kthehet me një “përgjigje të fortë”, ndërsa reagimet në tregjet në zhvillim mund të jenë të ndryshme, në varësi të shkallës së mbështetjes së tyre në SHBA për sigurinë ekonomike.
Analistja gjithashtu e bëri një dallim mes tarifave të vendosura nga Trump në mandatin e tij të parë dhe atyre aktuale, duke thënë se më parë taksat ishin të synuara, kryesisht kundër Kinës.
“Kjo është krejt ndryshe. Kjo është Trump që thotë: Unë do ta përmbys sistemin e Bretton Woods. Unë do ta përmbys globalizimin ashtu siç e kemi njohur”, tha ajo, duke iu referuar një marrëveshjeje të vitit 1944, e cila vendosi themelet e rendit ekonomik pas Luftës së Dytë Botërore.
“Mendoj se ky do të jetë momenti përcaktues i presidencës së tij. Shpresoj që të mos e shtyjë SHBA-në dhe botën drejt një recesioni”, shtoi ajo.