Shtetet e Bashkuara ia kanë dhënë dritën e gjelbër udhëheqësisë së re të Sirisë për të inkorporuar mijëra ish-luftëtarë rebelë të huaj xhihadistë në ushtrinë e vendit, me kusht që procesi të bëhet në mënyrë transparente, ka thënë emisari i presidentit amerikan, Donald Trump.
Tre zyrtarë sirianë të mbrojtjes thanë se, sipas këtij plani, rreth 3.500 luftëtarë të huaj, kryesisht ujgurë nga Kina dhe vendet fqinje, do t’i bashkohen një njësie të re, Divizioni i 84-të i ushtrisë siriane, në të cilin do të përfshihen edhe disa sirianë, raporton agjencia e lajmeve “Reuters”.
Kur u pyet nga agjencia “Reuters” në Damask nëse Uashingtoni e ka miratuar integrimin e luftëtarëve të huaj në ushtrinë e re siriane, Thomas Barrack, ambasador i Shteteve të Bashkuara në Turqi, i cili muajin e kaluar u emërua emisar i posaçëm i Trumpit në Siri, tha: “Do të thosha se është një mirëkuptim, me transparencë.”
Ai tha se është më mirë që këta luftëtarë, shumë prej të cilëve janë “shumë besnikë” ndaj administratës së re të Sirisë, të mbahen brenda një projekti shtetëror, sesa të përjashtohen.
Çështja e të huajve që u ishin bashkuar rebelëve të grupit Hayat Tahrir al-Sham të Sirisë gjatë luftës 13-vjeçare mes grupeve rebele dhe forcave të ish-presidentit Bashar al-Assad ka qenë njëra nga temat më të tensionuara që e kanë penguar rivendosjen e lidhjeve me Perëndimin që nga rrëzimi i Assadit nga pushteti në fund të vitit të kaluar.
Të paktën deri në fillim të majit, Shtetet e Bashkuara ishin duke kërkuar nga udhëheqësia e re siriane që gjerësisht t’i përjashtonte luftëtarët e huaj nga forcat e sigurisë.
Megjithatë, qasja e Uashingtonit ndaj Sirisë ka ndryshuar dukshëm që nga vizita e presidentit Trump në Lindjen e Mesme muajin e kaluar. Trumpi është pajtuar që t’ia heqë Sirisë sanksionet e periudhës së Assadit, u takua në Arabinë Saudite me presidentin e përkohshëm sirian, Ahmed al-Sharaa, dhe e emëroi si emisar të posaçëm për këtë shtet Barrack-un, të cilin e ka mik të ngushtë.
Dy burime të afërta me Ministrinë e Mbrojtjes të Sirisë i thanë agjencisë “Reuters” se Sharra dhe rrethi i tij kanë qenë duke argumentuar para zyrtarëve perëndimorë se futja e luftëtarëve të huaj në ushtri do të paraqesë më pak rrezik ndaj sigurisë se braktisja e tyre, gjë që do t’i afronte tek orbita e ISIS-it ose al-Qaedas.
Departamenti i Shtetit i ShBA-së dhe një zëdhënës qeveritar sirian nuk iu përgjigjën kërkesave për koment.
Luftëtarët e huaj brenda grupit Hayat Tahrir al-Sham kanë fituar reputacion si besnikë, të disiplinuar dhe militantë me përvojë dhe e formuan shtyllën e të ashtuquajturave njësite vetëvrasëse. Ata luftuan kundër ISIS-it dhe krahëve të tjerë të al-Qaedas nga viti 2016, kur grupi Hayat Tahrir al-Sham u nda nga organizata e themeluar nga Osama bin Ladeni./Nacionale