Sekretari i Jashtëm i Mbretërisë së Bashkuar, David Lammy, sot gjatë qëndrimit të tij në Kosovë ka takuar edhe krerët e partive opozitare.
Më herët ai takoi kreun e PDK-së, Memli Krasniqi dhe kreun e AAK-së, Ramush Haradinaj.Por, nga LDK-ja njoftuan se kryediplomatin britanik e ka pritur nënkryetarja e Lidhjes Demokratike të Kosovës, Doarsa Kica-Xhelili.
Bashkë me të ishin edhe anëtarët e Kryesisë së LDK-së, Muhamet Hamiti dhe Alush Gashi.
LDK tha se gjatë takimit u diskutua mbi zhvillimet aktuale politike në vend dhe qëndrimet e LDK-së karshi këtyre çështjeve.
“LDK mirëpret emërimin e ambasadores Karen Pierce si e Dërguar e Posaçme për Ballkanin Perëndimor. Lidhja Demokratike e Kosovës vlerëson dhe falënderon Mbretërinë e Bashkuar për përkrahjen e vazhdueshme në proceset e shtetndërtimit të Kosovës”, u tha në njoftim.
LDK nuk dha ndonjë sqarim për mungesën e kryetarit Lumir Abdixhiku në këtë takim me Lammy.