Presidentja e Kosovës, Vjosa Osmani, pret që institucionet e reja të formohen sa më shpejt.
Ajo ka bërë me dije se një gjë e tillë është shumë e nevojshëm për Kosovën.
Pas konferencës me kryediplomatin britanik, shefja e shtetit ka thënë se zhvillimet globale nuk e presin Kosovën.
“Ka kohë të mjaftueshme deri në përgatitjen e seancës konstituive, i uroj suksese partive politike, Kuvendit dhe shpresoj që ky proces të shkojë sa më mirë. Është me rëndësi që sa më parë të kemi konstituimin e Kuvendit dhe formimin e një qeverie, sepse zhvillimet gjeopolitike janë të shpejta dhe globi nuk na pret”, është shprehur Osmani.
Ajo ka bërë me dije se nuk do të ndërhyj në krijimin e koalicioneve për formimin e qeverisë së re.
Sipas saj, një gjë të tillë nuk ia lejon Kushtetuta.
“Siç e dini, unë si presidente nuk kam të drejtë vote dhe pavarësisht se në të kaluarën ka pasur president që janë përzier në çështjen e koalicioneve, i konsideroj ato çështje partiake dhe sipas Kushtetutës nuk janë detyrë e imja. Jam besimplotë që deputetët do të bëjnë çmos që kjo seancë të jetë e suksesshme”, ka theksuar Osmani.Presidentja Vjosa Osmani dje ka caktuar 15 prillin si datë ku do të mbahet seanca konstituive e legjislaturës së nëntë.
Pavarësisht caktimit të datës, Lëvizja Vetëvendosje ende nuk ka treguar se kush do të jetë kandidati i saj për kryetar të Kuvendit.
Partia fituese e zgjedhjeve të 9 shkurtit nuk ka treguar as me kënd do ta formojë qeverinë Kurti 3.
Deri me tani, zyrtarët më të lart të kësaj partie kanë thënë vetëm se do ta formojnë qeverinë e re, por nuk ka treguar nëse i kanë 61 vota për këtë gjë.
Për këtë çështje sot ka folur edhe nënkryetari i VV-së, Glauk Konjufca.
Në një prononcim të shkurtër, ish-kryetari i Kuvendit ka ka treguar se me kënd VV-ja do ta formojë qeverinë.
“Krejt ka çka presim është që të themelohet shumë shpejt Qeveria e Republikës së Kosovës në Parlament. Fillimisht Parlamenti duhet të konstituohet”, ka thënë Konjufca.
Një ditë më parë, qëndrimin e saj e ka dhënë edhe ministrja në detyrë e Drejtësisë, Albulena Haxhiu.
Ajo ka lënë të nënkuptohet se VV-ja do të tentojë të komunikojë veç e veç me deputetët e partive opozitare.
“Besoj se tashmë pas certifikimit të rezultateve vazhdon puna për themelimin e institucioneve të Republikës së Kosovës, gjegjësisht edhe për Qeverinë Kurti 3. Ne do të kemi përpjekje të vazhdueshme për të takuar grupe parlamentare, përjashto këtu opozitën, pra me partnerët tanë të koalicionit te cilët edhe jemi, por edhe natyrisht me të tjerët të cilët do t’i kemi”, ka thënë Haxhiu.
Kurse, kryeministri në detyrë Albin Kurti ka bërë me dije se VV-ja synon që në seancën konstituive do t`i formojë të gjitha institucionet.
“Pasi u certifikubn rezultatet, është një seancë ku japim betimin. Synojmë një seancë për t’u zgjedhur edhe kryetari, kryesia e Kuvndit, edhe qeveria, siç e kemi bërë edhe herën e kaluar në të njëjtën ditë”, ka thënë Kurti të shtunën.
Ajo që dihet është se pa ndihmën e partive opozitare VV-ja nuk mund t`i formojë institucionet.
Deri me tani, tri partitë opozitare kanë bërë me dije se nuk bashkëpunojnë me partinë në pushtet.
Nëse VV-ja dështon të sigurojë shumicën e nevojshme për formuar Qeverinë, PDK-ja, LDK-ja dhe AAK-ja janë shprehur të gatshme të bashkëpunojnë për marrje të përgjegjësisë.