Në sagën më të re të ditirambeve mediatike për Edi Ramën, Batoni, po rrekej të dërgonte një mesazh shumë më të kobshëm…
Qasja për t’ju kundërvënë me libër shtëpie Baton Haxhiut, pas një shkrimi ku ngrinte një shtatore lavdie dhe lavdërimesh për Edi Ramën, është më së paku jo produktive.
Kjo, jo thjesht se Batoni publikoi një shtatore tjetër edhe më të madhe ditirambesh ndaj bablokut, pasi edhe pse vë emrin e tij, nuk është Haxhiu që i shkruan ato fjalë të radhitura. Jo!
Është vetë lartgjatësia e tij, kryeministri i plotfuqishëm Edi Rama, ndërkohë që Batoni, është thjesht një mjet për të arritur qëllimin.
Nëpërmjet Batonit, Edi Rama synon t’i flasë në mënyrë të koduar e të përcjellë sinjale në ato qarqe, ku nuk mund t’i thotë gjërat direkt, ndaj përdor gjuhën e drunjtë.
Baton Haxhiu, është njeriu më i afërt i Edi Ramës, pasi jo vetëm e mbron atë prej 12 vitesh, ekran më ekran, por edhe dërgon mesazhe në frëngjitë e “hasmit”, të cilët e ftojnë shpesh për të marrë e dhënë, edhe ato mesazhe të tilla. Që në fund përfundojnë, siç e kemi parë me pazare për vula, kode e gradaçela në Tiranë.
Baton Haxhiu, ka më shumë se një vit, që është personazhi më i afërt i Edi Ramës, që ka sulmuar mediatikisht në të shkruar dhe televizione, kryebashkiakun e Tiranës, Erion Veliaj. Me të cilin kanë pasur prej kohësh edhe replika në distancë.
Shumë, madje edhe Veliaj vetë, la të kuptojë se Haxhiu është mërzitur se nuk ka marrë reklamat apo punët e kërkuara nga bashkia për bashkëpunim mediatik apo sondazhe.
Në të vërtetë, Batoni, e ndërmori atë hap, vetëm e vetëm me shtysën dhe kërkesën e Edi Ramës. Për të dërguar mesazhin në qarqet ndërkombëtare, por edhe në institucionet e tjera me influencë, se Babloku i Ymer Lalës e kishte braktisur njeriun më të rëndësishëm pas tij në Partinë Socialiste. E kur ndodhi ajo që ndodhi, gjërat dolën sheshit.
Kurse në sagën më të re të ditirambeve mediatike për Edi Ramën, Batoni, po rrekej të dërgonte një mesazh shumë më të kobshëm.
Sipas asaj që shkruante Batoni, Edi Rama, është i zhgënjyer nga njerëzit që ka përreth, e tani kërkon ta bëjë gjithçka vetë, duke marrë të gjitha frenat e pushtetit në dorë. Që do të thotë se nuk i del pushteti ekzekutiv, por kërkon edhe më shumë.
Nuk i del buxheti i shtetit për ta menaxhuar, nuk i del e drejta ekskluzive për të dhënë leje për kulla mbi 12 kate si kryetar i KKT-së, nuk i del fuqia për të emëruar personalisht gjithë krerët e policisë, shërbimeve sekrete, ambasadorët, apo edhe të dërguar në institucione të pavarura. Por kërkon edhe më shumë.
“Autokracia nuk lind vetëm nga ambicia e një lideri. Lind edhe nga boshllëku përballë tij. Nga mungesa e ideve, nga mungesa e organizimit, nga mungesa e një zëri që flet për më shumë se nostalgji. Dhe në këtë pikë, është shumë më shqetësuese një opozitë që nuk arrin të përqafojë asnjë ide përtej të kaluarës, sesa një lider që ka vendosur një ide të vetme dhe e ndjek me ngulm. Sepse në fund të fundit, ajo që rrezikon demokracinë nuk është vetëm pushteti që zgjatet, por sidomos boshllëku që nuk mbushet”, shkruan Rama me emrin e Batonit.
Sinjali është i dukshëm. Edi Rama po i kërkon opozitës që pas 11 majit të ndryshohet sistemi zgjedhor, e më shumë gjasa edhe institucione të tjera. Pasi Babloku, nuk do të ikë nga politika në fund të mandatit të katërt. Ka mundësi që ta ketë planifikuar të lërë postin e kryeministrit, duke synuar një karrike tjetër, atë të Presidentit të Republikës.
Në vitin 2027, përfundon mandati i Presidentit aktual, Bajram Begaj. Pikërisht kur Rama thotë që mbarojnë edhe negociatat me BE-në për anëtarësim. E kështu, ka vizatuar një rrugë të ngjashme me mentorin e tij politik Rexhep Taip Erdogan, që të synojë karriken e kreut të shtetit.
Ka shumë mundësi që të mos e përmbysë Kushtetutën, duke e bërë kreun e shtetit, edhe kryetar qeverie si sulltani. Por mjafton që Presidenti të zgjidhet nga populli dhe të ketë pak më shumë kompetenca që ka aktualisht. Kontrolli i diplomacisë, shërbimeve, policisë, ushtrisë e drejtësisë, është në duart e tij. E përveçse i gjithëpushtetshëm, bëhet dhe i paprekshëm. Sidomos kur zgjidhet me votë popullore. Nëse ndërkombëtarët kanë vendosur të bëjnë të njëjtën gjë siç bënë me Metën dhe Berishën, pra ta kapin kur të ikë, ua djeg kartën. Duke u bërë President, e këtë ka dashur të thotë Rama nën emrin e Batonit. i cili bën atë që ka bërë gjithë kohën, tu shërbejë shefave të vet, qofshin ata jugosllavë apo edhe shqiptarë si Hashimi me Edi Ramën./ Pamfleti