Administrata Trump po ndjek marrëveshje me disa shtete për t’i marrë emigranët e dëbuar nga Shtetet e Bashkuara të Amerikës, raporton “Wall Street Journal” duke cituar zyrtarë të njohur me çështjen.
Zyrtarët e emigracionit po kërkojnë më shumë destinacione ku mund të dërgojnë emigrantët të cilët ShBA dëshiron t’i dëbojë, shtetet e së cilëve refuzojnë t’i marrin.
Sipas gazetës së njohur amerikane, modeli i dëshiruar bazohet në një marrëveshje që administrata e arriti me Panamanë në shkurt, sipas së cilës 100 emigrantë, kryesisht nga Lindja e Mesme, u dërguan me një aeroplan për atje.
Më pas, Panamaja i ndaloi ata dhe punoi për t’i dërguar në vendet e tyre të origjinës. Ndërkohë, zyrtarët raportohet se janë në biseda me vende në Afrikë, Azi dhe Evropën Lindore, por nuk po kërkojnë domosdoshmërisht të nënshkruajnë marrëveshje formale, transmeton Nacionale.
Çfarë do të ndodhte më pas me emigrantët e dëbuar, do të varej nga specifikat e vendit që do t’i pranonte ata. Shtetet e Bashkuara nuk janë të bindura, shembull, nëse personit do t’i lejohej të kërkonte azil apo të dëbohej për në shtetin nga vjen, kanë thënë këta zyrtarë.
Në mesin e vendeve të cilave ShBA u ka kërkuar t’i pranojnë të dëbuarit, janë Libia, Ruanda, Benini, Eswatini, Moldavia, Mongolia dhe Kosova.
ShBA shpreson që këto shtete të pajtohen me kërkesat e Administratës, ndoshta në këmbim të marrëveshjeve financiare apo përfitimit politik duke ndihmuar presidentin Trump që të përmbushë një nga top prioritetet e tij të brendshme.
Në një deklaratë, një zëdhënës i Departamentit të Shtetit nuk komentoi bisedat diplomatike private, por tha se “zbatimi i ligjeve të imigracionit të vendit tonë është jashtëzakonisht i rëndësishëm për sigurinë kombëtare dhe sigurinë publike të Shteteve të Bashkuara, duke përfshirë sigurimin e zbatimit të suksesshëm të urdhrave përfundimtarë të largimit”.