Kryeministri i Pakistanit ka thirrur një takim urgjent të Autoritetit të Komandës Kombëtare, përgjegjës për mbikëqyrjen e arsenalit bërthamor të vendit.
Ky është takimi i parë i njohur publikisht i NCA-së që nga shkurti i vitit 2019, i cili vjen ndërsa Pakistani intensifikon kundërsulmin e tij si pjesë e Operacionit Bunyan-ul-Marsoos.Operacioni ushtarak i Pakistanit quhet “Bunyanun Marsoos”, një term që rrjedh nga Kurani dhe që do të thotë “strukturë e fortë dhe e bashkuar”.
Ministri i Informacionit i Pakistanit tha në mediat sociale se operacioni u krye me kujdes të veçantë për të shmangur viktimat civile, duke synuar ekskluzivisht instalimet ushtarake të përdorura më parë për sulme kundër Pakistanit.
Paralajmërim për luftë bërthamore
Një luftë bërthamore mund të shpërthejë “në çdo moment” nëse India vazhdon të nisë sulme, paralajmëroi në të njëjtën kohë shefi i mbrojtjes i Pakistanit.
Ministri i Mbrojtjes Khawaja Asif bëri paralajmërimin e ashpër në një intervistë me kanalin televiziv Geo News të Pakistanit, ndërsa tensionet midis dy fuqive bërthamore arrijnë një pikë ekstreme.
Ministri tha: “Nëse ata imponojnë një luftë totale në rajon dhe nëse ekziston rreziku i konfrontimit, atëherë një luftë bërthamore mund të fillojë në çdo kohë.”
“Nëse ato përshkallëzohen ekziston mundësia e një lufte në të cilën të dyja palët mund të përdorin armë bërthamore, atëherë përgjegjësia për këtë do të bjerë mbi Indinë”, shtoi ai.
Kryeministri i Pakistanit më parë akuzoi Indinë për nxitje të “ferrit” në rajon pas sulmeve të natës në tokën pakistaneze dhe i dha leje ushtrisë së tij për të nisur një sulm me raketa në shenjë hakmarrjeje.
Një luftë bërthamore në rajon mund të vriste 125 milionë njerëz, dhe bota po u bën thirrje të dyja palëve të bëjnë një hap prapa nga pragu i greminës.