Presidenti i Shteteve të Bashkuara të Amerikës, Donald Trump të mërkurën prezantoi tarifa për pothuajse të gjitha mallrat që hyjnë atje.
Ndërkohë, CNN raporton se Bashkimi Evropian po përgatit kundërmasa, derisa blloku preket me 20 për qind tarifa për importat nga atje.
Të njëjtat, u cilësuan si “goditje e madhe për ekonominë botërore”, transmeton Nacionale.
Bashkimi Evropian është një partner i madh tregtar i ShBA-së. Vitin e kaluar, ishte tregu më i madh i vetëm për eksportet e mallrave amerikane, përpara fqinjëve të Amerikës, Kanadasë dhe Meksikës, bazuar në shifrat nga Byroja e Regjistrimit të Shteteve të Bashkuara.
“Njoftimi i presidentit Trump për tarifat ndaj të gjithë botës, duke përfshirë edhe Bashkimin Evropian, është një goditje e madhe për ekonominë botërore. Më vjen shumë keq për këtë zgjidhje” – ka thënë Ursula von der Leyen, presidentja e Komisionit Evropian, duke shtuar se efekti i tarifave do të ndihet menjëherë.
“Europa është gati të përgjigjet” – ka shtuar ajo.
“Ne tashmë po finalizojmë paketën e parë të kundërmasave në përgjigje të tarifave për çelikun dhe tani po përgatitemi për kundërmasa të mëtejshme për të mbrojtur interesat dhe bizneset tona nëse negociatat dështojnë”.
Theksojmë se eksportet e Kosovës drejt Shteteve të Bashkuara do të përballen me një tarifë të re prej 10%, pas vendimit të fundit të Presidentit Donald Trump.
Kosova figuron në listën e vendimit për të vendosur tarifa mbi pothuajse të gjitha mallrat që hyjnë në Shtetet e Bashkuara, një vendim i cili ka tronditur partnerët tregtarë të Amerikës.
Duke folur nga oborri i Shtëpisë së Bardhë, Trump e quajti këtë ditë “një nga më të rëndësishmet në historinë amerikane”, duke theksuar se ShBA-ja është shfrytëzuar për dekada të tëra nga partnerët e saj tregtarë.
“Amerika është plaçkitur, shkatërruar dhe përdhunuar ekonomikisht nga vendet e tjera. Në shumë raste, miku është më i keq se armiku,” deklaroi ai.