Presidenti i Turqisë, Recep Tayyip Erdogan, ka paralajmëruar se sulmet ndaj anijeve civile në Detin e Zi mund të shkaktojnë përshkallëzim të mëtejshëm të tensioneve në rajon, duke theksuar se një zhvillim i tillë nuk është në interes të asnjërës palë.
Erdogan i bëri këto deklarata të shtunën, gjatë një konference të përbashkët për media me presidentin ukrainas, Volodymyr Zelenskyy, i cili po qëndron në Stamboll për një vizitë pune.
Gjatë takimit, dy liderët diskutuan për situatën e sigurisë në Detin e Zi, si dhe për përpjekjet për të garantuar lundrimin e sigurt në këtë zonë strategjike.
Presidenti turk shprehu gatishmërinë e Ankarasë për të kontribuar në përpjekjet diplomatike që synojnë përfundimin e luftës në Ukrainë.
“Ne jemi të gatshëm të bëjmë çdo përpjekje të mundshme për të hapur rrugën drejt paqes në Ukrainë”, deklaroi Erdogan.
Ai foli edhe për rindërtimin e Ukrainës pas përfundimit të luftës, duke vlerësuar rolin që mund të kenë kompanitë turke, të cilat kanë vazhduar aktivitetin e tyre në këtë shtet pavarësisht konfliktit të nisur në vitin 2022.
Takimi mes Erdogan dhe Zelenskyyt zhvillohet në një kohë kur siguria në Detin e Zi mbetet një nga çështjet kryesore për të dyja vendet, veçanërisht sa i përket mbrojtjes së transportit detar dhe lundrimit të anijeve civile.