E marta e 21 prillit do të rikthejë vëmendjen te një prej kapitujve më lavdiplotë të historisë sonë të re. Në orën 11:00, Varrezat e Dëshmorëve të Kombit në Baballoq do të mirëpresin homazhet në nderim të 28-vjetorit të nisjes së luftës frontale të Ushtrisë Çlirimtare të Kosovës në Zonën e Dukagjinit. Kjo datë, e skalitur në kujtesën historike si “Beteja e Baballoqit”, shënon momentin kur rezistenca e armatosur mori përmasat e një ballafaqimi të hapur dhe të paepur për liri.
Ky përvjetor vjen si një thirrje për reflektim mbi sakrificën sublime të dëshmorëve dhe martirëve. Përtej një ceremonie protokollare, ky përvjetor konsiderohet një bashkim i krenarisë me dhimbjen e përbashkët, ku prania e qytetarëve dhe bashkëluftëtarëve rikonfirmon zotimin për të mos lejuar pluhurin e harresës mbi amanetin e atyre që ranë në lufën për liri dhe pavarësi.
Në rrafshin historik, ngjarjet e prillit të vitit 1998 në Baballoq përcaktuan fatin e luftës në tërë Zonën e Dukagjinit. Ishte pikërisht kjo betejë që dëshmoi se UÇK-ja kishte arritur pjekurinë taktike për t’u përballur frontalish me forcat okupatore, duke u kthyer në një mburojë të pathyeshme për popullatën civile dhe një korridor jetik për vijimin e luftës.
Sot, pas gati tri dekadash, nderimi te Varrezat e Dëshmorëve mbetet akti më i lartë i mirënjohjes ndaj bijve dhe bijave që shkruan historinë me gjak. Tubimi i kësaj të marte synon të mbajë gjallë frymën e rezistencës dhe lavdinë e përjetshme të të gjithë atyre që u flijuan për Kosovën e lirë./Korrespodenti