Zhvillimi i shpejtë i Inteligjencës Artificiale (IA) po na vendos para një pyetjeje thelbësore: Çfarë do të thotë të jesh njeri kur makinat mund të tejkalojnë inteligjencën tonë? Ndërsa ekspertë të ndryshëm parashikojnë se IA super-inteligjente do të bëhet realitet para vitit 2030, rreziku më i madh nuk është humbja e vendeve të punës, por një krizë e thellë identiteti për njerëzimin.
Ky alarm ngrihet nga autorët Tyler Cowen dhe Avital Balwit, të cilët theksojnë se përparimi i IA-së ka qenë marramendës. Nëse në vitin 2019 një model IA-je mezi numëronte deri në pesë, vetëm pak vite më vonë, GPT-4 kaloi me sukses provimet e mjekësisë dhe avokatisë, duke lënë pas shumicën e njerëzve.
Ky ritëm i shpejtë na shtyn të pyesim se çfarë na bën ne të veçantë si qenie njerëzore dhe si do të gjejnë njerëzit kuptimin e jetës në një botë ku makinat janë më të afta se ata.
Pavarësisht kësaj sfide, autorët nuk e shohin të ardhmen me pesimizëm.
Ata besojnë se IA mund të sjellë një epokë të re lulëzimi dhe përparimi siç nuk e kemi parë kurrë më parë. Megjithatë, ata janë gjithashtu të bindur se duhet të përgatitemi për sfidën e madhe që sjell me vete kjo teknologji: se si t’i parandalojmë njerëzit të ndihen të pavlerë dhe të demoralizuar përballë një inteligjence superiore.
Fëmijët dhe nipërit tanë do të përballen me detyrën e vështirë për të ndërtuar jetë me kuptim në një botë ku ata nuk janë më entitetet më të zgjuara. Çështja nuk është vetëm teknologjike, por thelbësisht njerëzore. A jemi ne gati për këtë epokë të re? /Korrespodenti