Autoritetet ruse po përballen me një infeksion që dyshohet se është i rrezikshëm dhe që u lëshua si pasojë e një incidenti laboratorik në Siberi. Një studiuese humbi jetën pasi u prek nga infeksioni. Incidenti ndodhi në Institutin e Kërkimeve Kundër Murtajës në Shelekhov, pranë Irkutskut.
CNN shkruan se nuk është e qartë se çfarë infeksioni ka dalë nga laboratori. Një person, punonjëse laboratori që thuhet se humbi jetën në incident, u diagnostikua me një pneumoni me origjinë “të panjohur”.
“Situata sanitare dhe epidemiologjike në rajonin e Irkutskut, qytetet e Irkutskut dhe Shelekhov është e qëndrueshme”, – thanë mediat ruse. Sipas tyre janë marrë masa pasi punonjësja që humbi jetën u diagnostikua me “pneumoni me etiologji ose shkak të panjohur”.
Kreu i republikës fqinje të Buryatia, Alexei Tsydenov, tha se punonjësja 28-vjeçare vdiq “ndoshta nga murtaja”. Ai gjithashtu vuri në dukje se “nuk ka shpërthime të murtajës” në Buryatia.
Guvernatori i Irkutskut, Igor Kobzev, bëri thirrje për qetësi, duke thënë se u mbajt një takim i jashtëzakonshëm i komisionit rajonal anti-epidemik me mjekun kryesor të shtetit të Rusisë.
Një fabrikë alumini pranë laboratorit e udhëzoi stafin të vendoste maska si masë paraprake. Drejtori i Uzinës bëri thirrje për qetësi dhe vuri në dukje se “ka shumë thashetheme dhe raporte kontradiktore që qarkullojnë”.
Raportime jozyrtare, përfshirë ato nga media rajonale të pavarura thonë se gati 200 persona janë vënë nën vëzhgim në spitalin në Shelekhov, ku u dërgua tekniku i laboratorit. Në karantinë është vendosur edhe një nga maternitetet e qytetit.
Infeksioni në rajonin e Irkutskut “ka shumë të ngjarë të mos jetë murtajë, por edhe nëse konfirmohet, nuk do të ketë përhapje të kësaj sëmundjeje”, tha një ish-drejtues i agjencisë ruse të mbrojtjes së konsumatorit. Sipas tij, fillimi i motit të ftohtë ka të ngjarë të parandalojë transmetimin.
Murtaja pneumonike është një nga tre llojet e murtajave që shkaktohen nga bakteri Yersinia pestis. Dy llojet e tjera zakonisht përhapen nga kontakti me pleshtat e infektuar, kafshët ose indet e infektuara. Por murtaja pneumonike, ose murtaja me bazë mushkërish, mund të transferohet lehtësisht nga një person te tjetri përmes grimcave të frymëmarrjes.
Pacientët me murtajë pneumonike kanë ethe, dhimbje koke, dobësi dhe “një pneumoni që zhvillohet me shpejtësi me gulçim, dhimbje gjoksi, kollë dhe nganjëherë mukus me gjak ose ujë”.
OBSH ka vënë në dukje se murtaja ka një shkallë të lartë vdekshmërie, por gjithashtu trajtohet lehtësisht me antibiotikë dhe me përdorimin e masave paraprake për të parandaluar infeksionet.