Pretendimet e bujshme të Bob Lazar, ish-teknikut që deklaroi se qeveria amerikane mban dokumente sekrete ku Jezusi përshkruhet si rezultat i një ndërhyrjeje gjenetike nga jashtëtokësorët, mbeten pa asnjë provë zyrtare apo shkencore, pavarësisht se vazhdojnë të ushqejnë teoritë e konspiracionit për UFO-t. Deklaratat e tij, të bëra për herë të parë në vitin 1989, përfshijnë aludime se inteligjencat jashtëtokësore kanë formësuar qëllimisht historinë dhe fetë njerëzore për të kontrolluar evolucionin tonë.
Pavarësisht rritjes së interesit publik për këto thënie, institucionet zyrtare të SHBA-së dhe komuniteti shkencor i kanë hedhur poshtë ose i kanë injoruar plotësisht ato. Gjatë dekadave të fundit, asnjë dokument i deklasifikuar, asnjë provë fizike dhe asnjë element i prekshëm nuk ka konfirmuar ekzistencën e këtyre shkrimeve informuese. Për më tepër, hetimet mbi të kaluarën e vetë Lazarit zbuluan se ai kishte falsifikuar diplomat e tij universitare dhe se në kompleksin e Los Alamos kishte punuar thjesht si teknik kontraktor, dhe jo si fizikan siç pretendonte ai vetë.
Historia në fjalë nisi kur Bob Lazar deni publikisht në një televizion të Las Vegasit, duke pohuar se kishte punuar në objektin ultra-sekret “S-4”, i cili gjendet pranë bazës së famshme “Area 51” në Nevada. Sipas tij, detyra e tij kryesore ishte zbërthimi i teknologjisë së anijeve kozmike të sekuestruara. Gjatë kësaj periudhe, ai pretendon se i ranë në dorë dosje sekrete ku shpjegohej se qeniet jashtëtokësore (të cilat ai i quante “Të Gray-t” nga sistemi yjor Zeta Reticuli) kishin udhëhequr njerëzimin për 10 mijë vjet dhe kishin krijuar figura si Jezusi për të shërbyer si udhërrëfyes moralë.
Arsyeja pse ky tregim mbijeton ende në kulturën popullore lidhet ngushtë me sekretin e lartë shtetëror që ka rrethuar gjithmonë këto lokacione ushtarake. Vetë qeveria amerikane e pranoi zyrtarisht ekzistencën e Area 51 vetëm në vitin 2013, pas dekadash të tëra mohimi, gjë që rriti automatikisht dyshimet dhe spekulimet e publikut.
Studiuesit e mediave vërejnë se kombinimi i teknologjisë së avancuar me elementet e besimit fetar krijon tregime që përhapen shpejt dhe jetojnë gjatë, pasi prekin pyetjet më të thella ekzistenciale të njerëzimit mbi origjinën tonë brenda kozmosit./Korrespodenti