Donald Trump sapo postoi një mesazh në rrjetin e tij social Truth. Ai deklaron se “Mbretëria e Bashkuar, dikur aleati i madh i Amerikës, ndoshta më i madhi nga të gjithë, më në fund po e shqyrton seriozisht dërgimin e dy transportuesve të avionëve në Lindjen e Mesme”.
“Është në rregull, kryeministër Starmer, nuk kemi më nevojë për to – por do t’i kujtojmë”, thotë Trump. “Nuk kemi nevojë që njerëzit të bashkohen në luftëra pasi i kemi fituar tashmë!” shton ai.
Ministria e Mbrojtjes e Britanisë së Madhe bëri me dije një ditë më parë se “Shtetet e Bashkuara kanë nisur të përdorin bazat ushtarake të Britanisë së Madhe për “operacione specifike mbrojtëse që synojnë të pengojnë Iranin të lëshojë raketa në rajon”
Njoftimi erdhi pas disa ditësh ankesash nga presidenti amerikan Donald Trump lidhur me atë që ai e ka cilësuar si bashkëpunim të pamjaftueshëm nga ana e aleatit britanik.
Sipas komunikatës, Mbretëria e Bashkuar ka dërguar gjithashtu një helikopter Merlin në rajon për të forcuar aktivitetet e mbikëqyrjes. Ndërkohë, avionët Typhoon dhe F-35 të Forcave Ajrore Mbretërore vazhdojnë të patrullojnë hapësirën ajrore mbi Qipro, Jordani dhe Katar.