Një incident i pazakontë dhe me rrezikshmëri të lartë ka ndodhur mbrëmjen e së martës në portin e Barit, ku një automjet me targa shqiptare përfundoi në det ndërsa po tentonte të imbarkohej në tragetin me destinacion Shqipërinë.
I riu, një shtetas shqiptar, i cili ishte i vetmi person në mjet, arriti të shpëtonte në një akt guximi të rrallë: ai theu xhamin e përparmë të makinës, doli dhe u ngjit mbi tavanin e automjetit ndërsa ai po fundosej me shpejtësi.
Ai u shpëtua në momentet kritike nga efektivët e Roja Bregdetare dhe mbeti fatmirësisht i palënduar. Pamjet e drejtuesit të mjetit, i cili shihet teksa qëndron mbi makinën e tij që zhytet, janë bërë shpejt virale në mediat italiane dhe shqiptare.
Sipas rindërtimit fillestar të ngjarjes, aksidenti ndodhi pasi automjeti kishte kaluar të gjitha kontrollet e sigurisë në terminalin e trageteve. Drejtuesi i mjetit dyshohet se humbi kontrollin në momentin që po afrohej për të hipur në rampën e tragetit. Shiu i dendur dhe kushtet e këqija të motit mendohet se kanë ndikuar ndjeshëm në orientimin dhe dukshmërinë e shoferit, duke bërë që ai të kalonte limitet e breshkës dhe të përfundonte në ujë.
Menjëherë pas rënies së makinës, në vendngjarje mbërritën efektivë të Rojës Bregdetare, Njësitë e Zjarrfikësve dhe zhytës. Roja Bregdetare ndërhyri me shpejtësi duke shmangur një tragjedi. Pasi u nxor në breg, shoferi u asistua nga personeli shëndetësor që ndodhej aty, duke mos pësuar lëndime serioze.
Incidenti vijon me aksionin e zhytësve të Zjarrfikësve, të cilët po punojnë për të rikuperuar automjetin nga thellësia e ujit. Ngjarja vjen si një paralajmërim për rreziqet e lundrimit dhe imbarkimit në kushte të rënda atmosferike./Korrespodenti