Mbretëria e Bashkuar ka nisur zhvendosjen e avionëve të Forcave Ajrore Mbretërore (RAF) dhe mjeteve të tjera ushtarake drejt Lindjes së Mesme, në përgjigje të një paralajmërimi të drejtpërdrejtë nga Irani se do të synojë bazat e aleatëve perëndimorë nëse ata ndihmojnë Izraelin në konfliktin gjithnjë e më të ashpër me Teheranin.
Kryeministri britanik Sir Keir Starmer, gjatë udhëtimit për në samitin e G7 në Kanada, nuk përjashtoi mundësinë që Britania të ofrojë mbështetje ushtarake për Izraelin, ashtu siç bëri në tetor të vitit të kaluar, gjatë një sulmi me raketa balistike nga ana e Iranit.
Deri tani, Mbretëria e Bashkuar nuk ka marrë pjesë në asnjë veprim ushtarak që nga fillimi i sulmeve ajrore të Izraelit të premten, por Starmer theksoi se vendi po vepron në mënyrë të kujdesshme dhe strategjike.
“Nuk do të hyj në detaje,” tha kryeministri britanik për gazetarët. “Këto janë vendime operative. Situata është në zhvillim, prandaj nuk do të jap hollësi, por po lëvizim mjete, përfshirë avionë luftarakë, drejt rajonit. Kjo është pjesë e përgatitjes për çdo skenar të mundshëm.”
Starmer nuk komentoi as raportet që sugjeronin se Britania nuk kishte pasur dijeni paraprake për sulmet izraelite që shpërthyen përshkallëzimin më të ashpër ushtarak midis Tel Avivit dhe Teheranit në dekadat e fundit.
“Nuk do të flas për çfarë informacioni kishim në atë moment apo çfarë kemi marrë që atëherë,” tha ai. “Por ne jemi në diskutime të vazhdueshme me aleatët tanë, përfshirë Shtetet e Bashkuara, dhe shkëmbimi i informacionit është i pandërprerë”, shtoi ai.
Lëvizja e trupave britanike dhe avionëve në rajon vjen mes frikës së një përshkallëzimi të mëtejshëm që mund të përfshijë aktorë të tjerë rajonalë dhe të shndërrojë konfliktin në një luftë më të gjerë.