Një avancim teknologjik pritet të revolucionarizojë sigurinë kundër zjarrit. Kompania kineze Safmax ka zbuluar një material të ri me nano-membranë, i cili ka aftësinë të përballojë temperatura ekstreme prej 1,200°C (2,192°F) pa u deformuar, tkurrur apo shkrirë.
Kjo risi u prezantua në Ekspozitën e Teknologjisë së Sigurisë Publike në Kinë dhe pritet të ndryshojë standardet e mbrojtjes nga zjarri.
Materiali i ri, i cili mund të aplikohet në pëlhura të zakonshme në një trashësi sa vetëm një për qind e një fije floku njerëzor, është provuar se është jo vetëm rezistent ndaj nxehtësisë, por edhe i papërshkueshëm nga uji dhe era, duke ruajtur në të njëjtën kohë aftësinë për të lëshuar ajër.
Kjo e bën atë ideal për pajisje që kërkojnë mbrojtje maksimale, por pa kompromentuar komfortin e përdoruesit.
Sipas Safmax, materiali është projektuar kryesisht për uniforma zjarrfikësish dhe batanije shpëtimi.
Aftësia e tij për të ofruar mbrojtje kundër nxehtësisë intensive është veçanërisht e rëndësishme në skenare të rrezikshme, siç janë zjarret e shkaktuara nga bateritë e litiumit, të cilat janë gjithnjë e më të zakonshme dhe vështirë për t’u kontrolluar.
Kjo nano-membranë ofron një alternativë dukshëm më të sigurt dhe më efektive sesa materialet tradicionale si pambuku i rezistencës ndaj flakës apo veshjet mbrojtëse me shumë shtresa, duke e bërë atë një zgjidhje të shumëpritur për profesionistët që rrezikojnë jetën e tyre çdo ditë. Zbulimi i Safmax-it shënon një hap të madh përpara në luftën kundër zjarrit, duke ofruar jo vetëm mbrojtje, por edhe një shpresë për një të ardhme më të sigurt. /Korrespodenti