Një studim i ri i publikuar në revistën shkencore BMJ Open ka nxjerrë në pah se abuzimi verbal në fëmijëri mund të shkaktojë dëme në shëndetin mendor po aq serioze dhe afatgjata sa dhuna fizike, transmeton Inteligjenca n’3D.
Analiza përfshiu të dhëna nga 20,687 të rritur në Angli dhe Uells, të mbledhura nga shtatë studime të zhvilluara mes viteve 2012 dhe 2024, ku u përdorën pyetësorë të standardizuar për përvojat e abuzimit në fëmijëri dhe mirëqenien mendore në moshë madhore.
Rezultatet treguan se personat që kishin përjetuar dhunë fizike gjatë fëmijërisë kishin 52% më shumë gjasa të raportonin nivel të ulët të mirëqenies mendore, ndërsa ata që kishin përjetuar abuzim verbal kishin një rritje edhe më të lartë të këtij rreziku, prej 64%.
“Rezultatet sugjerojnë që abuzimi verbal në fëmijëri mund të lërë plagë në shëndetin mendor po aq të thella dhe afatgjata sa ato të shkaktuara nga abuzimi fizik,” u shpreh profesori i shëndetit publik në Universitetin Liverpool John Moores, Mark Bellis, autor kryesor i studimit.
Analiza tregoi gjithashtu se, edhe kur dhuna fizike ishte pjesë e përvojave të fëmijërisë, shtimi i abuzimit verbal sillte rreziqe shtesë.
Pjesëmarrësit pa histori abuzimi kishin një prevalencë prej 16% të mirëqenies së ulët mendore, ndërsa kjo përqindje rritej në 22.5% për ata që kishin përjetuar vetëm dhunë fizike, 24% për ata me vetëm abuzim verbal dhe 29% për ata që kishin përjetuar të dyja format e abuzimit.
Një tjetër gjetje ishte ndryshimi i prevalencës së abuzimit me kalimin e kohës. Dhuna fizike është përgjysmuar nga rreth 20% për ata të lindur në vitet 1950–1979, në 10% për ata të lindur pas vitit 2000. Në të kundërt, abuzimi verbal është rritur nga 12% për të lindurit para vitit 1950, në rreth 20% për ata të lindur në ose pas vitit 2000. Prof. Bellis e cilësoi këtë trend shqetësues: “Është alarmante që dhuna fizike po zëvendësohet me dhunë verbale, duke rrezikuar të zhbëjë përfitimet që do të prisnim nga reduktimi i dëmtimit fizik.”
Ai shtoi se studimi nuk ka mundur të masë ashpërsinë e secilës formë abuzimi apo arsyet e këtyre ndryshimeve, por theksoi se “nuk mjafton t’u thuash prindërve çfarë të mos bëjnë; duhet t’u ofrojmë mbështetje dhe udhëzime të qarta për të rritur fëmijë në mjedise të shëndetshme dhe përkujdesëse”.
Studimi gjithashtu vuri në dukje dallime gjinore në mirëqenien mendore: meshkujt kishin më shumë gjasa të ndiheshin rrallë optimistë, të dobishëm ose të afërt me të tjerët, ndërsa femrat raportonin më shpesh se nuk ndiheshin të relaksuara.
Jessica Bondy, themeluese e organizatës Words Matter, tha se këto gjetje konfirmojnë se “fjalët mund të lëndojnë thellë dhe të kenë ndikim të qëndrueshëm në shëndetin dhe zhvillimin mendor të fëmijës”.
Ajo paralajmëroi se “çdo përparim në uljen e dhunës fizike rrezikon të zhbëhet nga rritja e rasteve të abuzimit verbal” dhe bëri thirrje për veprim të menjëhershëm: “Duhet të ndërtojmë fëmijët – jo t’i rrëzojmë. Shëndeti mendor i brezit të ardhshëm dhe e ardhmja jonë e përbashkët varen nga kjo.” /Inteligjenca n’3D