Dr. Curr Gjocaj, obstetër-gjinekolog me përvojë të gjatë, në një ligjëratë për platformën “Inteligjenca n’3D”, trajton një nga sfidat më delikate të kohës sonë: pamundësinë për të pasur fëmijë. Ai thyen tabutë e vjetra, duke sqaruar se infertiliteti është një problematikë që prek njësoj burrat dhe gratë.
Me një gjuhë të thjeshtë, Dr. Gjocaj udhëzon çiftet se kur është koha e duhur për të kërkuar ndihmë dhe cilat janë hapat konkretë që ofron mjekësia moderne, përfshirë fertilizimin in-vitro (IVF), si një dritare shprese.
Sipas tij, bindja e gabuar se për mungesën e fëmijëve duhet fajësuar vetëm gruaja është tashmë e tejkaluar. Shkenca moderne ka vërtetuar pa ekuivok se shkaqet e infertilitetit ndahen në mënyrë të barabartë mes të dy partnerëve
“Përpara ka qenë një mentalitet i gabuar në popullatën tonë ku është fajësuar ekskluzivisht vetëm gjinia femërore, por me zhvillimin e shkencës është parë shumë qartë që kjo problematikë iu takon të dy gjinive, pra si mashkullit, ashtu edhe femrës,” thotë Dr. Curr Gjocaj.
Diagnoza e infertilitetit, sipas tij, vendoset vetëm pasi një çift ka tentuar të ketë fëmijë përmes marrëdhënieve të pambrojtura për të paktën një vit pa sukses. Vetëm pas kësaj periudhe, këshillohet të nisin kontrollet dhe analizat e nevojshme për të dy partnerët.
“Infertiliteti është një situatë kur një çift ka marrëdhënie seksuale të pambrojtura për të paktën një vit dhe nuk kemi shtatzëni. Pas një viti duhet ta marrë çështjen në konsideratë dhe të fillojnë kontrollet e analizat për të gjetur shkakun,” shpjegon Gjocaj.
Duke folur për teknologjinë moderne, Gjocaj përshkruan procesin e fertilizimit in-vitro (IVF) në terma të thjeshtë. Ai tregon se kjo metodë e anashkalon pengesën natyrale, duke e bërë të mundur bashkimin e qelizës mashkullore dhe femërore në kushte laboratorike, para se embrioni i krijuar të transferohet në mitrën e nënës.
“Një gjë që duhej të ndodhte në formë natyrale brenda trupit të njeriut, tash shkenca e ka mundësuar që atë rrugë të pamundur ta shkurtojë, ta bëjë atë bashkim në laborator dhe më pas këtë embrion ta vendosë brenda mitrës së nënës që të rritet aty,” tregon ai.
Një faktor kritik që çiftet duhet ta kenë parasysh, sipas tij, është koha. Ai paralajmëron se në Kosovë, legjislacioni aktual e lejon kryerjen e procedurave IVF pa kufizime deri në moshën 42-vjeçare të gruas. Prandaj, ai këshillon çiftet që t’i shfrytëzojnë këto mundësi ligjore para se të arrijnë këtë kufi.
“Në vendin tonë aktualisht mosha e lejuar për të realizuar këto procedura është dyzet e dy vjet. Kur një çift e ka një moshë afër këtij kufiri, është mirë që pa kaluar kjo moshë të shfrytëzojë mundësinë ligjore që të fillojë këto procedura me kohë,” këshillon Dr. Curr Gjocaj.
Dr. Gjocaj ndan edhe një dimension thellësisht njerëzor dhe emocional të profesionit të tij. Ai flet për kontrastin e fortë mes botës së çifteve që kërkojnë ndërprerjen e shtatzënisë dhe atyre që vuajnë pa masë për ta arritur atë.
“Kemi kontakte me ata që, fatkeqësisht, aplikojnë procedurat e aborteve dhe, në anën tjetër, kemi një botë tjetër që aq shumë vuan që ta ketë një shtatzëni të dëshiruar. Pra, jemi me emocione të dyfishta në jetën tonë praktike dhe profesionale”, shprehet Gjocaj.
Rrugëtimi drejt prindërimit mund të jetë i mbushur me sfida dhe pasiguri, por siç na kujton Dr. Gjocaj, shkenca moderne ka hapur dyer që dikur ishin të mbyllura. Infertiliteti nuk është më një fund i pashpresë. Me informacionin e duhur, mbështetjen mjekësore dhe veprimin në kohën e duhur, ëndrra për të krijuar një familje është më e arritshme se kurrë më parë.
Ligjëratën e plotë të Dr. Curr Gjocaj në Inteligjenca n’3D, e gjeni në videon më poshtë: