Një mjet i inteligjencës artificiale është trajnuar me më shumë se 40 milionë fotografi për të përcaktuar tregues kyç të shëndetit të një personi.
Mosha biologjike e një personi dhe gjasat e tij për t’i mbijetuar kancerit mund të vlerësohen nga një fotografi e vetme e fytyrës, sipas studiuesve.
Një mjet i inteligjencës artificiale, i zhvilluar nga ekspertët e Mass General Brigham në Massachusetts, është trajnuar me më shumë se 40 milionë fotografi për të përcaktuar tregues kyç të shëndetit të një personi.Autorët e studimit, të botuar në revistën The Lancet Digital Health, thanë se parashikimet për mbijetesën e pacientëve me kancer më pas u krahasuan me të dhënat reale të pacientëve për të verifikuar saktësinë e tyre.
Plakja biologjike tregon sa i vjetër është organizmi për nga gjendja shëndetësore dhe funksionimi, dhe jo thjesht nga numri i viteve që ka jetuar një person.Studiuesit zbuluan se mënyra e jetesës ndikon edhe në shenjat e plakjes në fytyrë: konsumimi i tepërt i alkoolit, përdorimi i drogës dhe duhanpirja u shoqëruan me një pamje që tregonte moshë biologjike më të madhe.
Lidhja më e qartë u vërejt te duhanpirja. Duhanpirësit aktualë dukeshin më të moshuar se ish-duhanpirësit, ndërsa këta të fundit dukeshin më të moshuar se personat që nuk kishin pirë kurrë duhan.
Hugo Aerts, profesor në Universitetin e Harvardit dhe drejtor i programit të inteligjencës artificiale në mjekësi në Mass General Brigham, tha se puna e re «e çon një hap më tej fushën e inteligjencës artificiale që vlerëson shëndetin përmes fytyrës, duke mësuar të parashikojë mbijetesën drejtpërdrejt nga fotografitë e fytyrës së pacientëve me kancer».
«Me sa dimë, kjo është hera e parë që demonstrohet se një model i inteligjencës artificiale mund të parashikojë drejtpërdrejt mbijetesën e pacientëve me kancer nga një fotografi e thjeshtë», shtoi ai.
Raymond Mak, profesor i asociuar i onkologjisë së rrezatimit në Shkollën Mjekësore të Harvardit, tha se ekipi ishte befasuar nga qëndrueshmëria e rezultateve «pavarësisht ndryshimeve të zakonshme në fotografitë e përditshme, përfshirë pozën, ndriçimin, shprehjen e fytyrës dhe grimin».
«Qëllimi ynë është që vlerësimi shëndetësor i bazuar në fotografitë e fytyrës të mbështetet më shumë në tregues të matshëm, të japë rezultate më të qëndrueshme dhe të mund të përdoret në shkallë më të gjerë, për të mbështetur vendimet për trajtime të personalizuara, jo për të zëvendësuar gjykimin e mjekut», shtoi ai.
Personat e interesuar mund të ngarkojnë një fotografi dhe të marrin vlerësimin e tyre duke iu bashkuar studimit në faceage.bwh.harvard.edu.