Presidenti amerikan Donald Trump ka paralajmëruar Kubën që të hyjë në bisedime me Shtetet e Bashkuara, duke theksuar se do të ndërpresë furnizimin me naftë dhe mbështetje financiare që ishulli merrte nga Venezuela, nëse nuk arrihet një marrëveshje.
Trump bëri këtë të dielë një paralajmërim të fortë në platformën e tij Truth Social, duke deklaruar se “nuk do të ketë më naftë apo para që shkojnë në Kubë — zero!” dhe se vendi duhet të negociojë “para se të jetë tepër vonë.”
Reagimi vjen pas arrestimit të udhëheqësit venezuelan Nicolás Maduro gjatë një operacioni në kryeqytetin e Venezuelës më 3 janar, duke krijuar një ndryshim të rëndësishëm në marrëdhëniet rajonale dhe duke cenuar furnizimin energjetik të Kubës që varet prej dekadash nga nafta venezuelane.
Trump nuk ka dhënë detaje për kushtet e një marrëveshjeje apo për pasojat e sakta në rast refuzimi, por theksoi se marrëdhënia e gjatë midis Kubës dhe Venezuelës, ku Havana kishte ofruar “shërbime sigurie” në këmbim të ndihmës energjetike dhe financiare, ka marrë fund.
Qeveria kubane ende nuk ka reaguar publikisht ndaj paralajmërimit të Trumpit.