Një incident i pazakontë diplomatik ndodhi më 18 shkurt në Arabinë Saudite, gjatë një raundi negociatash mes delegacioneve të Rusisë dhe Shteteve të Bashkuara.Burime të cituara nga gazeta ruse Agentstvo zbuluan tensione të mëdha brenda ekipit rus, të cilat u kthyen në një skenë të sikletshme përpara syve të amerikanëve.
Sipas raportimeve, presidenti Vladimir Putin kishte emëruar pa koordinim të plotë dy ekipe të ndryshme për të përfaqësuar Rusinë – një vendim që u shndërrua në një burim përplasjeje direkte mes zyrtarëve të lartë rusë.Fillimisht, delegacioni ishte përbërë nga ministri i Jashtëm Sergei Lavrov dhe ndihmësi i Putinit, Yuri Ushakov. Më vonë, pa paralajmërim, u bashkua edhe i dërguari special i Putinit, Kirill Dmitriev – një shtesë që shkaktoi tension të menjëhershëm në dhomë.
Kur Dmitriev mbërriti në dhomën e takimeve, Lavrov reagoi ashpër, duke refuzuar që ai të ulej në tavolinë dhe madje i largoi karrigen. “Nëse dëshiron të marrë pjesë, le të më thotë personalisht Vladimir Vladimirovich”, – citohet të ketë thënë Lavrov, duke iu referuar Putinit.
Pas incidentit, Dmitriev u detyrua të largohej nga dhoma dhe të qëndronte në korridor, ku sipas burimeve, foli me gazetarët. E gjithë skena ndodhi para syve të delegacionit amerikan, të cilët, sipas gazetës, mbetën të habitur nga përplasja publike e zyrtarëve rusë.
“Secili shkon tek Putini veç e veç, dhe ai u jep mesazhe të ndryshme. Kjo është arsyeja pse Rusia shpesh nuk ka një qëndrim të qartë në negociata”, – tha burimi i Agentstvo.
Deri tani, nuk ka pasur asnjë reagim zyrtar nga Kremlini apo nga pala amerikane lidhur me incidentin.