Ushtria e SHBA-së ka përfunduar me sukses një operacion të rrezikshëm kërkim-shpëtimi brenda territorit iranian, duke rikuperuar pilotin e dytë (oficerin e sistemeve të armatimit) të një avioni luftarak F-15E të rrëzuar të premten.
Presidenti Donald Trump konfirmoi se oficeri, i cili kaloi mbi 24 orë i fshehur në malet e Iranit ndërsa ndiqej nga forcat armike, tashmë është i sigurt dhe “shëndoshë e mirë” pavarësisht disa lëndimeve. Ky shpëtim vjen në një moment kritik, vetëm 48 orë para skadimit të ultimatumit amerikan ndaj Teheranit për një marrëveshje të re, ose në të kundërt do të përballen me sulme masive mbi infrastrukturën energjetike.
Misioni i shpëtimit ishte jashtëzakonisht kompleks dhe përfshiu dhjetëra avionë që fluturuan në lartësi të ulëta në jugperëndim të Iranit për të nxjerrë ekuipajin që ishte hedhur me parashutë pas goditjes së avionit.
Ndërsa njerëzit u shpëtuan, humbjet materiale ishin të konsiderueshme; avioni F-15E u shkatërrua plotësisht, ndërsa forcave amerikane iu desh të shkatërronin në tokë edhe dy avionë të tyre transporti C-130 Hercules për të parandaluar rënien e teknologjisë në duart e Iranit. Ky ishte avioni i dytë amerikan i rrëzuar brenda një dite, pas një avioni A-10 që u godit pranë Ngushticës së Hormuzit, piloti i të cilit u shpëtua gjithashtu pas një operacioni ku u sulmuan edhe helikopterët e shpëtimit.
Pavarësisht humbjes së mjeteve fluturuese, Presidenti Trump insistoi se aftësia për të tërhequr ekuipazhet të gjallë nga thellësia e territorit armik vërteton “superioritetin dërrmues ajror” të SHBA-së mbi hapësirën iraniane. Nga ana tjetër, komanda ushtarake e Iranit pretendoi se ka shkaktuar dëme të mëdha gjatë këtyre ndërhyrjeve, duke deklaruar se kanë rrëzuar helikopterë Blackhawk dhe mjete transporti në zonën e Isfahanit.
Situata mbetet e tensionuar ndërsa lufta në Lindjen e Mesme ka hyrë në javën e pestë, duke destabilizuar tregjet financiare dhe rritur çmimet e energjisë globalisht. Ndërsa Izraeli vazhdon të bombardojë zonat petrokimike në Iran, Teherani ka paralajmëruar se “portat e ferrit do të hapen” nëse SHBA dhe Izraeli proceedojnë me sulme të tjera, duke u kundërpërgjigjur tashmë me goditje ndaj infrastrukturës së ujit dhe energjisë në Kuvajt./Korrespodenti