Ukraina mund të detyrohet të pranojë një marrëveshje “qiraje territoriale” me Rusinë, sipas një plani të administratës Trump për t’i dhënë fund luftës.
Sipas burimeve të cituara nga “The Telegraph”, marrëveshja do t’i linte Moskës kontrollin de facto të rajonit të Donbas-it, ndërsa Kievi do të ruante pronësinë ligjore mbi territorin.
Rusia do të paguante një kosto të papublikuar për përdorimin e territorit.
Plani, i përpiluar në 28 pika pas një sërë bisedimesh të fshehta mes SHBA-ve dhe Rusisë, ka ripërditësuar drojën se Ukraina po përjashtohet nga diskutimet për të ardhmen e saj.
Përveç dorëzimit të kontrollit mbi Donbas-in, marrëveshja parashikon përgjysmim të ushtrisë ukrainase, ndalim të raketave me rreze të gjatë, fund të pranisë së trupave të huaja në vend dhe ndërprerje të ndihmës ushtarake amerikane.
Sipas planit, gjuha ruse do të bëhej zyrtare në territoret e pushtuara, ndërsa Kisha Ortodokse Ruse do të merrte status zyrtar.
Ukraina do të lejohej të negociojë vetëm garanci sigurie nga SHBA-të dhe qeveritë evropiane për të ruajtur armëpushimin.
Kievi ka hedhur poshtë planin, ndërsa Moska ka mohuar të ketë dijeni për të.
Donald Trump nuk komentoi drejtpërdrejt, por deklaroi se së fundmi i kishte thënë Vladimir Putinit: “Më lër ta zgjidh unë këtë luftë.”
Sipas burimeve të “The Telegraph”, Shtëpia e Bardhë dyshohet se i ka bërë presion presidentit ukrainas Volodymyr Zelensky të pranojë kushtet, duke shfrytëzuar dobësinë politike pas një skandali korrupsioni që po trondit administratën e tij.
Zelensky ka përsëritur vazhdimisht se nuk do të dorëzojë të gjithë Donbas-in si çmim për paqen.