Minatori kosovar Emin Hasani ndihet më afër Zotit kur e prish agjërimin e Ramazanit 800 metra nën tokë.
Pas një ndërrimi të gjatë dhe të zagushitur në minierën e Trepçës në Stantërg në Kosovën veriore, Hasani kontrollon orën për të ditur se kur po perëndon dielli në sipërfaqe dhe nëse ka ardhur koha për të ngrënë, raporton “Reuters”.
I ulur rreth një tavoline të vogël në një zyrë të improvizuar në minierë, ai dhe katër kolegë nxjerrin hurma, kos, turshi dhe djathë që i konsumojnë me çaj të zi me sheqer.
Burrat qeshin dhe bisedojnë me njëri-tjetrin ndërsa ndajnë vaktin e Iftarit, të ngrënë pas një dite agjërimi midis lindjes së diellit dhe perëndimit të diellit gjatë muajit të shenjtë mysliman të Ramazanit.
“Unë jam gjithmonë i lidhur me Allahun, në kohë si tani ku jemi 800 metra nën tokë”, tha Hasani para se të thoshte lutjet e tij. “Sa më thellë të shkoj, aq më afër ndihem me Allahun”.
Kosova është një vend me shumicë myslimane dhe qindra minatorë në minierën shtetërore të plumbit, zinkut dhe argjendit po kremtojnë Ramazanin, ndonjëherë duke duruar temperaturat afër 40 gradë Celsius dhe lagështinë ekstreme.
“Agjërimi nuk është problem për ne por mungesa e ajrit të pastër, pajisjeve moderne, veshjeve dhe këpucëve janë problem i madh”, tha shefi i ndërrimit, Fehmi Hajredini.
Trepça punësonte më shumë se 22,000 punëtorë në vitet 1970 dhe 80 dhe përbënte dy të tretat e bruto produktit të brendshëm të Kosovës (BPB). Tani ajo punëson vetëm 3,000 në miniera dhe objekte të tjera.
Çmimet e ulëta të mineraleve dhe pakësimi i prodhimit do të thotë se kompania nuk mund të mbulojë kostot operative dhe po kërkon subvencione nga qeveria.
Në qytetin e Mitrovicës, pak më larg nga miniera, Bashkim Kurti, CEO i Trepçës, tha se ishte në bisedime me qeverinë për një kredi prej 20 milionë euro për përmirësimin e kushteve të punës dhe rritjen e prodhimit.
