Qendrat për shpërndarjen e ndihmave në Gaza do të jenë të mbyllura për një ditë të mërkurën, përderisa ushtria izraelite paralajmëroi se rrugët që çojnë te këto qendra do të konsiderohen “zona luftimesh”.
Fondacioni Humanitar i Gazës, një rrjet kundërthënës i ndihmave, i mbështetur nga Shtetet e Bashkuara dhe Izraeli, që filloi të operonte javën e kaluar, tha se do t’i mbyllte qendrat për “punime të modernizimit, organizimit dhe efikasitetit”, raporton televizioni BBC.
Në një njoftim tjetër, Forcat e Mbrojtjes të Izraelin thanë se njerëzve do t’u ndalohet hyrja në qendrat e shpërndarjes së ndihmave ose udhëtimi nëpër rrugët që çojnë te to.
Të martën herët, të paktën 27 palestinezë u vranë nga zjarri i armëve izraelite afër një qendre të shpërndarjes së ndihmave, sipas Agjencisë së Mbrojtjes Civile, e cila drejtohet nga Hamasi.
Ky ishte incidenti i tretë vdekjeprurës në po kaq ditë që ndodhi në një rrugë që çon te qendrat e ndihmave të Fondacionit Humanitar të Gazës. Ushtria izraelite tha se trupat e saj shtien me armë pas identifikimit të të dyshuarve që lëvizën drejt tyre, “duke devijuar nga rrugët e përcaktuara për qasje në ndihma”.
Zëdhënësi i Agjencisë së Mbrojtjes Civile, Mahmoud Basal, tha se drejt civilëve u shtie me tanke, dronë e helikopterë afër një qendre të ndihmave.
Një mjek i huaj që punon në atë zonë e përshkroi skenën si “kërdi të plotë”. Në një deklaratë, ushtria izraelite tha se trupat e saj “nuk ishin duke e parandaluar arritjen e civilëve të Gazës te qendrat e shpërndarjes së ndihmave humanitare.