Nga Robert Schmad/
Arabella Advisors, një kompani konsulence me qëllim fitimi që më parë menaxhonte një nga rrjetet kryesore të parave të errëta të së majtës, është ristrukturuar mes shtimit të kritikave nga e djathta. Shumica e aktivitetit të Arabella-s do të kalojë te Sunflower Services, një korporatë me përfitim publik e kontrolluar nga tri organizata jofitimprurëse që më herët menaxhoheshin prej saj. Korporatat me përfitim publik, ndryshe nga bamirësitë, lejohen të gjenerojnë fitim, por duhet të kryejnë edhe veprimtari të dobishme për shoqërinë.
Vëzhguesit konservatorë dyshojnë se ky riorganizim synon të largojë rrjetin nga emri tashmë i kontestuar i Arabella-s dhe, ndoshta, të krijojë ndarje më të fortë ligjore mes degëve të saj 501(c)(3) dhe 501(c)(4). Para këtij ndryshimi, Arabella menaxhonte fondet New Venture, Windward, Hopewell, Sixteen Thirty, North, Telescope dhe Impetus, dhe tre të parat do të kalojnë nën Sunflower Services.
Eric Kessler, ish-zyrtar i administratës Clinton, themeloi Arabella Advisors në vitin 2005 si një firmë konsulence filantropike, e cila shumë shpejt u rrit dhe u cilësua nga Atlantic si “anija mëmë” e botës financiare liberale, duke menaxhuar një rrjet organizatash jofitimprurëse që shpërndajnë qindra miliona dollarë çdo vit për kauza të majta, përfshirë media lokale, fushata votimi, nisma në fletëvotim dhe madje edhe super PAC-e të afërta me demokratët.
Veprimtaria e Arabella-s qëndroi kryesisht nën radar për vite, por doli në pah pas shpenzimeve të mëdha gjatë administratës së parë Trump. Organizatat konservatore të mbikëqyrjes kanë publikuar dokumente që, sipas tyre, tregojnë se Arabella krijonte ndikim direkt mbi rrjetin e organizatave jofitimprurëse, duke bërë të paqartë vijën ndarëse mes aktivitetit politik dhe atij jopolitik, dhe kanë pretenduar se kompania ka përfituar nga kontratat jo-konkurruese për të pasuruar pronarët e saj.
E gjithë kjo i ka dhënë Arabella-s një famë që disa konservatorë e përshkruajnë si “toksike”, e ngjashme me reputacionin që George Sorosi ka në disa rrethe konservatore.
“Nuk mund të lexoj mendjet e tyre, por është e kuptueshme që gjithë kjo vëmendje mund t’i shqetësojë,” tha Scott Walter, president i Capital Research Center, për Washington Examiner. “Ata po përpiqen me ngulm të fshehin mënyrën se si funksionojnë realisht. Ndryshojnë letrat me kokë dhe logot, ka një riorganizim ligjor, por gjithmonë kanë pasur një strukturë të ndërlikuar. Tani e kanë edhe më të ndërlikuar, por janë të njëjtët njerëz që bëjnë të njëjtat gjëra.”
The Chronicle of Philanthropy raportoi të martën se 243 punonjës të Arabella-s do t’i bashkohen Sunflower Services si pjesë e ristrukturimit, një tregues qartësisht i vazhdimësisë, ashtu siç vuri në dukje Walter. Në këtë grup përfshihet edhe Allan Williams, nënkryetar i Arabella-s, i cili do të shërbejë si CEO i parë i Sunflower Services.
Walter dyshon se ribrandimi do të sjellë ndonjë ndryshim domethënës në aktivitetet ku rrjeti i organizatave jofitimprurëse përqendron burimet e tij.
“Mendoj se ata janë ribranduar si çdo kompani tjetër që bën këtë për të përmirësuar imazhin e biznesit, jo sepse do të ndryshojnë vërtet,” tha ai. Walter theksoi se fakti që rrjeti do të menaxhohet nga një korporatë me përfitim publik, e zotëruar nga tre 501(c)(3), mund të përdoret për të zbutur akuzat për politizim ose përfitime të brendshme, edhe nëse praktikisht nuk ndryshon asgjë.
Madje, Bill Gates, i cili ka dhënë ose ka premtuar afro gjysmë miliard dollarë për organizatat e menaxhuara nga Arabella ndër vite, njoftoi në gusht se do të ndërpresë financimin për rrjetin, si pjesë e një përpjekjeje për të depolitizuar veprimtarinë e tij bamirëse. Njoftimi për krijimin e Sunflower Services thekson se ajo do të menaxhojë fondet New Venture, Windward dhe Hopewell, të gjitha 501(c)(3), si edhe “disa projekte dhe organizata të tjera jofitimprurëse.” Ndërkohë, fondet 501(c)(4) që më herët menaxhoheshin nga Arabella, Sixteen Thirty, North dhe Impetus, nuk u përmendën, duke sinjalizuar ndarje të mundshme.
Fakti që të gjithë investitorët e Sunflower Services janë organizata 501(c)(3) sugjeron një ndarje të mundshme mes krahut 501(c)(3) të klientëve të Arabella-s dhe krahut të saj më politik 501(c)(4),” tha Tyler O’Neil, ekspert për organizata jofitimprurëse të së majtës, për Washington Examiner. “Kjo ndarje mund të tregojë se ndryshimi synon afrimin me kërkesat e IRS-së.”
Americans for Public Trust paraqiti një ankesë në IRS në gusht 2023, duke argumentuar se Arabella kishte keqinformuar autoritetet, pasi New Venture Fund kishte deklaruar në 2006 se menaxhimi nga Arabella “pritet të jetë i përkohshëm dhe, në fakt, ka vetëm një mandat njëvjeçar.” Prokurori i Përgjithshëm i Uashington D.C.-së hapi gjithashtu një hetim në shtator 2023 pas raporteve se New Venture Fund kishte përdorur në mënyrë të paligjshme donacione bamirëse për të shtyrë ligjvënësit dhe votuesit republikanë të mbështesin votimin me postë të zgjeruar, megjithëse çështja u mbyll më vonë.
“Nuk është aspak surprizë që emri Arabella u bë toksik pasi Americans for Public Trust punoi për të zbuluar rrjetin e gjerë të grupeve radikale të majta që ata krijuan dhe financuan,” tha Caitlin Sutherland, drejtoreshë ekzekutive e organizatës, në një deklaratë për Washington Examiner. “Tani, sapo kemi marrë deklarimet e tyre tatimore për vitin 2024, të cilat tregojnë një rekord prej 1.55 miliardë dollarësh shpenzime, Arabella ka njoftuar se do të ristrukturohet dhe do të ndryshojë emër. Kjo është vetëm një përpjekje e maskuar për të vazhduar të veprojnë në hije dhe për të shërbyer si kanal për paratë e huaja të errëta që ndikon politikën amerikane.”
“Edhe pse tingëllon e pafajshme, Sunflower Services e sapo shpallur do të vazhdojë trashëgiminë e Arabella-s në shtyrjen përpara të një agjende ekstremisht të majtë,” shtoi ajo. “APT do të vazhdojë të zbulojë përpjekjet e tyre të financuara nga jashtë dhe t’i mbajë përgjegjës ndaj publikut amerikan.”
Siç u përmend nga Sutherland, fondi Sixteen Thirty ka qenë në qendër të kritikave, pasi ka marrë shuma të mëdha nga miliarderi zviceran Hansjörg Wyss, ndërkohë që pothuajse të gjitha paratë i ka shpenzuar për të ndikuar politikën amerikane përmes nismave, fushatave dhe aktivizmit.
Ndarja e dukshme mes krahut politik dhe atij filantropik të ish-rrjetit Arabella mund të jetë një përpjekje për të rikthyer donatorë si Bill Gates. Presidenti i New Venture Fund, Lee Bodner, tha se ristrukturimi nuk u bë posaçërisht për të kënaqur Gates-in, por shtoi se ata do të ishin të lumtur ta pranonin sërish mbështetjen e tij.
Megjithatë, Walter beson se ky veprim do t’i ndihmojë rrjetit liberal të parave të errëta të mjegullojë më tej mënyrën se si operon.
“Le të themi se ata vazhdojnë të punojnë ngushtë me 501(c)(3) dhe 501(c)(4), por tani operacionet janë ndarë në dy entitete të ndryshme ligjore,” tha ai për Washington Examiner. “Kjo e bën historinë më të vështirë. Dhe meqenëse kemi arritur ta bëjmë Arabella-n të njohur, tani duhet të bëjmë po aq të njohura Sunflower dhe Vital Impact.”
Vital Impact është kompania që do të marrë pjesën tjetër të operacioneve të Arabella-s që nuk u transferuan te Sunflower Services. Kjo mund të përfshijë edhe fondin Sixteen Thirty, megjithëse kjo ende nuk dihet. Himesh Bhise, ish-CEO i Arabella-s, do të bëhet CEO i Vital Impact.
Pavarësisht ndryshimit të emrit, republikanët nuk po ulin presionin.
Komiteti i Mbikëqyrjes në Dhomën e Përfaqësuesve, i kontrolluar nga republikanët, i dërgoi një letër Sunflower Services të martën, duke kërkuar përgjigje për programin “Chorus Creator Incubator” të Sixteen Thirty Fund, i cili u jepte pagesa krijuesve të përmbajtjes online për të promovuar mesazhe liberale në rrjetet sociale. Në minimum, përgjigja e Sunflower Services mund të tregojë nëse ata ende kontrollojnë fondin Sixteen Thirty. / Washington Examiner