Blerim Avdiu është gjetur fajtor dhe është dënuar me gjashtë muaj burgim efektiv për kanosjen e ministrit në detyrë të Bujqësisë, Faton Peci.
Aktgjykimi është shpallur sot nga një gjyqtare e Gjykatës Themelore në Prishtinë. Ai nuk hyn në fuqi deri në një vendim të formës së prerë të shkallës së dytë të gjykatës.
Blerim Avdiu, një mërgimtar, akuzohet nga Prokuroria e Prishtinës për kanosjen e ministrit Peci.
Në seancën fillestare të mbajtur të martën, Avdiu e pranoi fajësinë për kryerjen e veprës penale të kanosjes dhe i kërkoi falje bashkë-kryetarit të partisë Guxo.
Mirëpo, Peci nuk e pranoi kërkimfaljen.
Ministri e konsideroi të pasaktë dhe të papranueshme deklaratën e të akuzuarit se në momentin e kanosjes së tij përmes mesazheve në rrjetet sociale, ai ka qenë në gjendje të dehur.