Vendet e Bashkimit Evropian ia kanë dhënë dritën e gjelbër heqjes së sanksioneve ekonomike Sirisë në përpjekje për ta ndihmuar rimëkëmbjen e shtetit të rrënuar nga lufta civile pas rrëzimit të Bashar al-Assadit, sipas diplomatëve që folën me agjenci të lajmeve.
Ambasadorët e 27 vendeve të BE-së arritën një marrëveshje preliminare për këtë vendim, i cili do të duhej të publikohej në takimin e ministrave të jashtëm në Bruksel të martën më vonë, thanë diplomatët, duke theksuar se vendimi përfundimtar u përket ministrave, raporton televizioni “Al Jazeera”.
Këto raportime vijnë pasi Shtetet e Bashkuara javën e kaluar njoftuan se do t’ia hiqnin sanskionet Sirisë.
Sirisë i ishin vendosur sanksione gjatë pushtetit të Assadit më 2012 dhe 2013 dhe kanë të bëjnë me transportin, energjinë dhe bankat, sipas reporterit të televizionit “Al Jazeera”, Hashem Ahelbarra, i cili raportoi nga selia qendrore e BE-së në Bruksel.
Udhëheqësia e re e Sirisë ka kërkuar nga Perëndimi që t’ia lehtësojë kufizimet në mënyrë që të mbështetet rindërtimi i vendit pas luftës së gjatë civile.
Diplomatët e BE-së i thanë agjencisë së lajmeve AFP se me marrëveshjen e re pritet të hiqen sanksionet që i kishin shkëputur bankat siriane nga sistemi financiar global dhe që ia kishin ngrirë asetet Bankës Qendrore.