Banorët e fshatit Bashaj në Vlorë janë detyruar të hapin vetë rrugën me kazma dhe lopata, pasi prej katër ditësh kanë mbetur tërësisht të izoluar nga pjesa tjetër e qytetit për shkak të shembjes së masivit të dheut nga mali.
Rreth 250 banorë, përfshirë mbi 70 familje, ndodhen pa asnjë lidhje rrugore, duke u përballur me vështirësi serioze në përditshmëri.
Mëngjesin e sotëm, banorët janë organizuar mes tyre dhe kanë nisur punën për të hapur rrugën aq sa munden, me qëllim krijimin e një kalimi minimal për këmbësorë dhe mjete emergjence.
Sipas tyre, deri më tani nuk ka pasur asnjë ndërhyrje nga institucionet përgjegjëse, ndërsa situata mbetet shqetësuese, veçanërisht për të moshuarit dhe familjet me fëmijë.
Banorët kërkojnë ndihmë urgjente për hapjen e plotë të rrugës dhe rikthimin e normalitetit në zonë.