Sekretari i Jashtëm i Mbretërisë së Bashkuar, David Lammy, ka arritur në Kosovë, duke nisur kështu vizitën zyrtare.Ai u prit në Aeroportin Ndërkombëtar të Prishtinës, “Adem Jashari”, nga ministrja e Punëve të Jashtme dhe Diasporës, Donika Gërvalla.
Rreth vizitës së tij u deklarua edhe MPJD-ja, që njofton se përveç arritjeve të rëndësishme të Kosovës, si forcimi i shtetit ligjor dhe demokracisë, zhvillimi ekonomik dhe integrimi ndërkombëtar, ministrja Gërvalla e informoi sekretarin Lammy për sfidat e sigurisë në Ballkan, përfshirë veprimet destabilizuese të Serbisë dhe ndikimin rus, të cilat vazhdojnë të rrezikojnë stabilitetin rajonal.
Ajo theksoi se vetëm përmes veprimeve të përbashkëta me aleatët mund të sigurohet ruajtja e paqes dhe stabilitetit, jo vetëm në Kosovë, por në të gjithë rajonin dhe më gjerë.
Partneriteti mes Kosovës dhe Mbretërisë së Bashkuar do të vazhdojë të forcohet dhe të thellohet, me fokus në përmirësimin e bashkëpunimit në fushat e sigurisë, ekonomisë dhe politikës ndërkombëtare”, thuhet në njoftimin e MPJD-së.