Një nismë ligjore e re në Uells, e cila synon ta shndërrojë gënjeshtrën e politikanëve gjatë fushatave zgjedhore në një vepër penale, ka ndezur një debat të ashpër mbi kufijtë e lirisë së fjalës dhe integritetin e demokracisë. Edhe pse projektligji arriti të kalojë pengesën e parë në Parlamentin e Uellsit (Senedd), ai është pritur me paralajmërime serioze nga vetë deputetët, përfshirë ata të partisë në pushtet, të cilët e konsiderojnë hartimin e tij si të nxituar dhe potencialisht të rrezikshëm.
Shqetësimi kryesor qëndron te “fuqitë e jashtëzakonshme” që ky ligj do t’i jepte shtetit për të ndërhyrë në diskursin politik, duke krijuar një precedent ku deklaratat “false ose mashtruese” mund të çojnë në ndjekje penale pa pasur ende një përkufizim të qartë se çfarë përbën saktësisht një shkelje të tillë.
Kritikët e kësaj mase, ku bëjnë pjesë edhe anëtarë të Laburistëve dhe Konservatorëve, argumentojnë se ligji rrezikon të pengojë debatin legjitim politik dhe të krijojë një efekt censurues mbi mediat dhe individët me ndërgjegje. Dy raporte dërrmuese nga komitete ndërpartiake kanë goditur projektligjin, duke vënë në dukje se ai u prezantua shumë vonë në mandatin parlamentar, duke mos lënë kohë të mjaftueshme për konsultime publike apo për të përcaktuar qartë se mbi kë do të zbatohej dhe në çfarë mënyre. Sipas këtyre raporteve, t’i kërkosh parlamentit të miratojë një vepër të re penale me pasoja jetësore për individët, ndërkohë që vetë natyra e veprës mbetet e paqartë, është një hap i paprecedentë që mund të dëmtojë themelet e procesit demokratik.
Nga ana tjetër, mbështetësit e rreptë të këtij ndryshimi, si ish-lideri i Plaid Cymru, Adam Price, insistojnë se publiku do të jetë tejet kritik nëse qeveria tërhiqet nga ky premtim. Ata argumentojnë se besimi te institucionet politike është thërrmuar pikërisht sepse gënjeshtra në politikë aktualisht nuk ka pasoja reale. Megjithatë, edhe brenda kampit mbështetës ka zëra që bëjnë thirrje për kujdes, duke theksuar se kalimi i një “ligji të keq” thjesht për t’u dukur mirë para votuesve mund të ketë kosto më të larta se sa mungesa e tij.
Ndërsa qeveria uellsiane mbron nismën si një mjet për të ndërtuar themele më të forta për demokracinë, fati i projektligjit mbetet i pasigurt deri në muajin shkurt, kur ai do t’i nënshtrohet amendamenteve të domosdoshme që mund të rezultojnë në ndryshimin e plotë të tij ose në heqjen e klauzolave më polemizuese./BBC/Korrespodenti