Një veprim në dukje krejtësisht i pafajshëm romantik u kthye në një tragjedi të rëndë për një familje meksikane. Julio Macías González, një 17-vjeçar nga Meksiko Siti, humbi jetën si pasojë e një goditjeje në tru (iktus), e cila u shkaktua në mënyrë të pabesueshme nga një “shenjë dashurie” (hickey) që i kishte bërë në qafë e dashura e tij 24-vjeçare. Ngjarja, e cila ka mbetur në analet e mjekësisë si një nga rastet më të rralla fatale, ka ngritur alarm mbi rreziqet e panjohura të traumave në zonën e qafës.
Sipas raporteve zyrtare, 17-vjeçari kishte kaluar pasditen me partneren e tij. Pasi u kthye në shtëpi, teksa ishte ulur në tryezë duke darkuar me familjen, Julio filloi të shfaqte papritur konvulsione (dridhje të forta të trupit) dhe humbi ndjenjat. Megjithëse prindërit njoftuan menjëherë emergjencën dhe ndihma e shpejtë mbërriti brenda pak minutash, mjekët nuk mundën ta rikthenin në jetë. Pas ngjarjes, familjarët e djalit fajësuan të dashurën e tij për presionin e ushtruar, e cila u largua nga qyteti e tmerruar nga pasojat e asaj që kishte ndodhur pa qëllim.
Mjekët ligjorë dhe kardiologët sqaruan se thithja intensive dhe presioni i fortë i ushtruar në anën e qafës goditi direkt arterien karotide, e cila është autostrada kryesore që dërgon gjakun e pasur me oksigjen nga zemra në tru. Veprimi shkaktoi atë që në mjekësi quhet “diseksion i arteries karotide”.
Presioni dëmtoi shtresën e hollë të brendshme të enës së gjakut dhe, si reagim mbrojtës për të ndaluar gjakderdhjen e brendshme, trupi krijoi me shpejtësi një mpiksje gjaku (tromb) në atë pikë. Disa orë më vonë, presioni i rrymës së gjakut e shkëputi këtë mpiksje dhe e shtyu atë drejt trurit, duke bllokuar një enë më të vogël cerebrale. Kjo ndërpreu furnizimin me oksigjen, duke sjellë iktusin iskemik dhe vdekjen e menjëhershme të qelizave nervore.
Mjekët kardiologë shpjegojnë se qafa është një nga zonat më vulnerabël të trupit të njeriut. Pikërisht në anët e fytit ndodhet edhe i ashtuquajturi “sinusi karotid”, një grup receptorësh që rregullojnë presionin e gjakut. Një presion i fortë apo goditje në këtë zonë mund të shkaktojë jo vetëm mpiksje, por edhe rënie drastike të rrahjeve të zemrës dhe tensionit.
Për fat të mirë, ky rrezik mbetet ekstremisht i ulët. Në literaturën mjekësore botërore janë të dokumentuara vetëm pak raste të ngjashme.
Rasti më i njohur para Julios ishte ai i vitit 2010 në Zelandën e Re, ku një grua 44-vjeçare pësoi një paralizë të përkohshme në krahun e majtë pas një rrethane të njëjtë, por fatmirësisht mbijetoi pasi u trajtua medikamentalisht. Rasti i Julio Macías González mbetet një paralajmërim tragjik për faktin se si një dëmtim sipërfaqësor në lëkurë mund të ketë efekte fatale thellë në sistemin vaskular./Korrespodenti